BIHAR INTHLAN: Candidate turte a chiang mek zel

BIHAR INTHLAN: Candidate turte a chiang mek zel
Bihar assembly inthlan hun atan chawlhkar hnih awrh chauh a awm tawh a, political party hrang hrangte pawhin an dintir turte an tichiang mek zel.
Thawh hniha November 6 leh 11-a inthlan turah hian BJP kaihhruai National Democratic Alliance (NDA) chuan an dinna tur bial an insem fel tawh a. Party lian pahnih, BJP leh Janata Dal (United) chuan bial 243 awmah bial 101 ve veah candidate an nei dawn a. Chirag Paswan-a kaihhruai LJP(RV) chuan bial 29-ah candidate neiin RLM leh HAM ten bial ruk ve ve an chang dawn.
Eptu lam tangrual, Mahadathbandhan-a party lian ber, Rashtriya Janata Dal (RJD) chuan bial 143 an chuh dawn a, an candidate turte pawh Thawhtanni khan an puang tawh.
Lalu Prasad Yadav-a kaihhruai party hian Congress, CPI (ML) L, CPI (M), CPI leh Vikassheel Insaan Party (VIP) a thawhpui a. Congress hian an candidate pawh an puang nual tawh bawk.
Hetih lai hian eptu tangruala tel thin, Bihar bika chhuahsan ta, Hemant Soren-a kaihhruai, Jharkhand Mukti Morcha (JMM) chuan inthlan hi an chuh dawn lo tih an puang leh thut thung.
An hruaitu hlun, Sudivya Kumar-a chuan Jharkhand-a Mahagathbandhan tangruala Congress leh RJD nena an thawhhona pawh an ennawn tur thu a sawi.
Inrinnia khan eptu tangrual atanga an inhnuhdawh hnuah Soren-a party hian a malin bial rukah inthlan an chuh tur thu hi an lo sawi tawh a. An chhuah chhan hi tangruala tel party-ten bial dinna tur an insem danah leh an thawhhonaah lungawi lohna a awm vang nia hriat a ni.
“RJD leh Congress hi inthlan kan chuh ve loh chhan ber an ni a. JMM hian hemi hi chhang letin kan thawhhona pawh kan ennawn ve ang,” tiin Jharkhand Tourism Minister Kumar-a chuan a sawi.
Congress hian Ningania an candidate 48 an puan hnuah Inrinni khan mi panga dang an puang leh tawh a ni.