Dan loa lakluh ramdang kuhva rah, Bilkhawthlira man bag 30 chuang chu a kang. Bilkhawthlir khua hian anmahni thar, an kuhva hralh tur ang chu an hralh zo thawkhat tawh thung.
-- Advertisement --
The Aizawl Post thudawn danin Bilkhawthlir Kuhva Chingtu Pawl duty chuan January 16 zan khan Vairengte atanga Bilkhawthlir lam pana tlan pik up truck, Assam registration atangin dan loa tawlh ramdang kuhva rah bag 16 an man a; January 16 zing khan truck pakhat, Assam registration tho, Bilkhawthlir paltlanga a chhuk leh chho zawnga tlan chu ringhlelin an enfiah a, sawhthing bag an phurh hnuaiah dan loa lakluh kuhva rah bag 25 an lo man sak tawh bawk.
Truck khalhtute hian Phaisen lamah kalui an tum niin an insawi a, Assam lamah man chang awm bawk mah se, an tlangpui chang a awm niin an sawi.
Heng kuhva rah mante hi Thawhlehni khan a phurhna lirthei atang hian hlan thlak a ni a, a kang nia sawi a ni.
Bilkhawthlir Kuhva Chingtu Pawl hruaitute sawi danin, kuhva rah neitu hi Silchar lam mi niin lirthei khalhtute hian an sawi a. A tawlhnaah hian Mizo an inrawlh ve deuh zel tih an sawi bawk.
Hlawk taka kuhva ching mektu Bilkhawthlir-a kuhva chingtu intelkhawm hian, Myanmar atanga dan loa tawlh luh kuhva rah vangin an kuhva hralhna kawngah harsatna an tawk tih an lo sawi tawh thin a, hma la tura sawrkar an ngenna in bawhzui a hlawh tawk lo nia hria in 2022 December 14 atang khan heng kuhva rah tawlhruk dap hian an duty tan a. Tun thlengin bag 300 chuang an man tawh a ni.
Bilkhawthlir khua hian kum 2021 khan an kuhva rah hralhna atangin cheng nuai 850 vel an leichhuak a, Covid leng vangin duh angin ‘home survey’ an nei thei loa, hemi ai pawh hian a tam zawk maithei tih an sawi. 2022-a an hralh tur ang an hralh zo thawkhat a, kum 2021 aiin an leichhuah that an inbeisei tih an sawi. 2023 ami tur pawh Vai hoin a kungah an hauh lawk leh tan tawh niin an sawi a ni.