Billboard 200-ah SZA ‘SOS’ a No.1

Billboard 200-ah SZA ‘SOS’ a No.1
SZA album ‘SOS’ chu Billboard 200 (albums) chart-ah a No.1 a, he chart-ah hian a zawn lovin kar 12 a No.1 tling ta a, hmeichhe zaithiam zingah 1986 hnua R&B/hip-hop album he chart-a No.1 ni rei thei ber a la ni.
SZA ‘SOS’ album hi December ni 9, 2022-a tlangzarh tawh kha niin, 2022 kum tawp lam leh 2023 kum tir lamah kar 10 chhung a No.1 tawh a, nikum December ni 20 khan la 15 dah belhin a deluxe version an tlangzarh leh a, chu chuan album hralh a tikal thar leh ta a, chart ranking siam nan hian a original album bakah a deluxe reissue hralhna te hi lak kawp vek a ni.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
SZA ‘SOS’ hi kar khat chhungin US-ah 1,30,000 an hralh leh a, chu chu chart No.15 atangin No.1 a kaipui leh ta a ni. ‘SOS’ hralhna hi 1,25,500 chu streaming atanga album hralhna tlukpui (on-demand official stream maktaduai 166.31) niin, album tak tak hralh chu 4,000 a ni a, album-a hla mal hralhna atangin 500 a tling thei bawk.
Chart No.1 hlui Kendrick Lamar ‘GNX’ chu 70,000 hralh lehin No.5 atangin No.2-ah a insawn thar leh a, chart No.1 hlui bawk Sabrina Carpenter ‘Short n’ Sweet’ chu 56,000 hralh lehin No.12 atangin No.3 a kai thar leh a, Wicked soundtrack chu 49,000 hralh lehin No.8 atangin No.4-ah a insawn a, Billie Eilish ‘Hit Me Hard and Soft’ chu 46,000 hralh lehin No.14 atangin No.5 a kai thar ve leh ta bawk.
Chart No.1 hlui Taylor Swift ‘The Tortured Poets Department’ chu 44,000 hralh lehin No.7 atangin No.6-ah a insawn leh hret a, Chappell Roan ‘The Rise and Fall of a Midwest Princess’ chu 41,000 hralh lehin No.16 atangin No.7 a kai thar ve leh ta bawk.
Chart top 10 khartu pathum, No.8-10 te chu top 20 hnuailama awm vek tawh hnu an ni a, top 10-ah an rawn lut thar leh hlawm. Chart No.1 hlui Morgan Wallen ‘One Thing at a Time’ chu 41,000 tling lo deuh hralh lehin No.29 atangin No.8-ah a invawrh thar leh a, Gracie Abrams ‘The Secret of Us’ chu 40,000 hralh lehin No.25 atangin No.9 a kai leh a, chart No.1 hlui bawk Tyler, the Creator ‘CHROMAKOPIA’ chu 38,000 hralh lehin No.27 atangin No.10-ah a invawrh thar ve leh ta bawk.