Billboard Artist 100-ah Morgan Wallen a No.1

Billboard Artist 100-ah Morgan Wallen a No.1
Copuntry singer Morgan Wallen chu Billboard Artist 100 chart-ah a No.1 a, he chart-a a tum sarih a No.1-na a ni ta. Hetihrual hian Gorillaz leh Karol G te pawh top five-ah an lang.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga album leh hla hralh tam dan te, radio airplay leh streaming te chu tehna pawimawh a ni.
Morgan Wallen hian a album thar ‘One Thing at a Time’ chu March ni 3 khan a tlangzarh a, he album hi hralh a kal hle a, karleh Billboard 200 (albums) chart-ah pawh a No.1 ngei dawn niin a lang a, he album-a a hla paruk chu Billboard Hot 100 (singles) chart-ah langin, chung zingan chuan ‘Last Night’ chu No.5 a ni nghe nghe a, heng te avang hian Artist 100 chart-ah a No.1 leh ta a ni. Tihian he chart-a a No.1 tawh zawng zawng belhkhawm chu kar sarih a tling ta a ni.
‘One Thing at a Time’ hi Morgan Wallen album pathumna a ni a, a album pahnihna ‘Dangerous: The Double Album’ khan Billboard 200 (albums) chart-ah kar 109 chhung top 10-ah a lang thei a, tunkar chart-ah pawh khan No.6 a la ni thei hial a ni.
Morgan Wallen hi core country act zingah he chart-a No.1 ni ngun ber niin, country artist zingah Jason Alden leh Luke Combs te kar thum ve ve No.1 tawhin an dawt. A nawlpuia laka he chart-a No.1 ni ngun ber chu Taylor Swift niin, ani hi kar 64 a No.1 tling tawh a ni.
Billboard Artist 100 chart-ah hian Gorillaz chu No.3-ah an rawn lang thar ve leh a, anni pawh hian an album thar ‘Cracker Island’ hralh that zar an zo a, he album hi Billboard 200 chart-ah No.3 a kai a, hei hian Artist 100 chart-ah a vawrh sang ve leh ta a ni.
Colombian singer Karol G pawh No.5-a ni a, he chart-a a tawn san ber a la ni. Ani pawh hian a album thar ‘Mañana Será Bonito’ hralh that zar a zo a, he album hi Billboard 200 (albums) chart No.1 a debut a, hmeichhe zaithiam, Spanish hla hlang album he chart-a No.1 pui thei hmasa ber a ni bawk.