Bio medical waste

Mizoram Government Doctors’ Association (MGDA) annual general conference hmanpuitu deputy chief minister chuan Smart City Project hnuaiah damdawi in thli leh bawlhhlawh – bio medical waste mumal zawka senghawi kawngah sawrkarin theihtawp a chhuah tih a sawi a. Hemi atan hian Aizawl Solid Waste Management Center Tuirialah bul tan chhoh a nih thu a sawi a.
Damdawi in thli leh bawlhhlawhte hi bawlhhlawh pangngai anga sawngbawl a rem ve lohna chhan tam tak a awm a. Damlo natna chi hrang hrang enkawlna thli leh bal a nih avangin natna hrik hlauhawm tak tak inkaichhawn theihna ‘chance’ a sang em em a. Hei hi mithiamte pawhin hriain damdawi in bawlhhlawh bik sawngbawlna hi a hranpaa neih tur tih a ni thin a. Damdawi in, khum 50 awm theihna chin chuan damdawi in bawlhhlawh halralna tur “Incinerator” anmahni pualin an nei vek tur a ni, tih dan te pawh a awm a. Hei hian Mizoramah chuan zawm a hlawh tha vak lo niin a lang.
Mizorama private damdawi inte hi phuahchawp tak tak a ni hlawm a. Damdawi in building tam zawk hi chu, damdawi in atan ve renga sak ni lo, in ruak pangngai luah tawp a ni deuh vek a. Damdawi in atan hrim hrima building sakte pawh hi, khawpui chhung residential area, chenna in bit takin a hual vel karah te a awm a. Hetiang damdawi in hian anmahni pualin Incinerator nei dawn pawh ni se, hospital compound-ah chuan dah ngaihna a awm lo.
Thawkkhat lai, kum sawm vel liam tawhah khan, Falkawn referral hospital-a Incinerator chu Aizawl khawpui chhunga private hospital te pawhin an hman tangkai ve theih tura ruahmanna siam a ni a; mahse, private hospital-te an inhuam em em laiin, sawrkar lamin a kalpui ziktluak leh thei ta si lo va, tun dinhmun hi kan thleng a ni.
Tunah ‘sawrkarin theihtawp a chhuah’ kan la ti leih leih chauh a ni a, damdawi in bawlhhlawh sawngbawl kawngah hi chuan kan ‘fail’ chiang hle a tih theih awm e. Tuna Aizawla damdawi in hrang hrang bawlhhlawh thehthang a nih dan hi mipui tan a him chiah em tih hi enfel a tha khawp ang.