Biodiversity leh ram hruaitute

Kar kalta May ni 22 kha International Biodiversity Day a ni a, Mizoramah pawh hmun thenkhatah higher secondary school leh high school-ah te zirlaite pualin hun hman a ni a. International Biodiversity Day thupui hi ‘Acting locally for global impact’ tih a ni.
Kan ram hruaitute hian Mizoram chu biodiversity hausa tak, ‘biodiversity hotspot’ a nih dan te an sawi thin. Zirlaite chu nakina ram kaihhruai hna la thawk tur an nih avangin tun atanga Biodiversity pawimawhna an hriat chian a, an humhalh thiam nan thing leh mau nungchate leh mihringte khawsakhonaa kan inlaichin dan leh kan inkungkaih dante pawh thiam takin an sawi thin. Kan chenna leh a chhehvel environment humhalh a pawimawhzia hi chawl lova inhrilh mawlh mawlh reng tur kan ni tehmeuh mai le!
Hetih lai, kum tina ‘Day’ a lo thlen apianga biodiveristy pawimawhna kan sawi reng lai hian, a humhalh kawngah ram hruaitute hian biodiversity chhe mek siam tha tur hian tha hi kan thawh tak tak leh si lo vin, ‘future leader’ te mawhphurhnaah hian kan nghat tawp mai em ni ang? tih hi zawhna awm thei a ni.
Hmasawnna rahbi thar mihringin a mamawh ang chi din nana loh theih lohva environment kan khawihchhiat ang chi hi chu thuhran ni se, ramngaw kan tihchereu nasatna ber thingtlang lo neih bansan zawnga eizawnna ngelnghet siam chhuah kawngah ram hruaitute hian rilru an pe na tawk lo deuh niin a ngaih theih a. Biodiversity Day a lo thlen apianga ‘ramngaw humhalh pawimawhzia’ sawi tlawr viau laia a humhalh lo zawnga thingtlang loneih kan la kalpui reng mai hi chu thil inhmeh lo tak a ni. Tuna Biodiversity Day thupui ‘Acting locally for global impact’ tih hi naupangte hrilhfiahin zawm turin han hrilh sa teh thin mah ila, an lo puitlin hun thleng pawha ‘ramngaw tichereu’ zawnga loneihna atana ram kan la hal kang dur dur reng a nih chuan, kan future leader-te tan pawh ‘humhalh’ zawnga hma lak chu a harsa hle ang a, future leader-te tihtura an sawi pial ve leh mai chuan, engtik khawtikah mah kan biodiversity hi kan humhim thei dawn lo tihna a ni.
Khawvel huapa biodiversity humhalhna kan kalpui dawn chuan kan kawtkai atanga bul tan a ngai a, mahni kawtkai kal pela hmun dang va vei vak khan awmzia a nei lo. Kan kawtkai theuh atanga bul kan tan that chuan, chumi infawkkhawm chu a lo ‘global’ mai dawn a; chumi thlen diktir tur chuan tuna ram hruaitute hian future leader-ten an hniakhnung an zui theih nan rahbi (system) tha tak hnutchhiah tura tan an lak nasat a ngai a ni ber mai.