BJP a sawrkar chuan ramri buaina chinfel nghal ang – Vanlalhmuaka

Mizoramah BJP a sawrkar chuan ramria buaina chinfel nghal a ni dawn tih BJP Mizoram president Vanlalhmuaka chuan a sawi.

BJP State president-in thuthar thehdarhtute a kawmnaah MLA inthlanpui kan hmachhawn turah BJP-in sawrkarna a siam a nih chuan Assam leh Mizoram ramri buaina chinfel a nih nghal tur thu leh Mizoram chuan nasa taka hma a sawn tur thu a sawi.

Sawrkar laipuiin eirawngbawlna gas la thei lo ten an neih theih nan a sawrkar laipui hmalakna chu Mizoramah a nih ang tur taka hman a nih ngei theih nan an party-in hma lak an tum thu a sawi bawk.

Zawhna chhangin Vanlalhmuaka chuan, Mizoramin central scheme atanga in sak tanpuina phase-I a dawn chu, a sum hmuh tur ang hmu zo tawh chungin a tak takah zaa 40 bak tih puitlin ala nih loh thu leh peihfel a nih hma chu phase-II dawn theih a nih loh thu a sawi a. Tun dinhmunah party dang thawhpui loa inthlanpui hmachhawn an tum thu leh sawrkarna siam turin Congress party tih loh party dangte chu thawhpui an hreh loh thu a sawi bawk.

BJP in sawrkarna an siam a nih chuan, health leh education kalphung siam danglam an tum tih a sawi a. Sawrkar zirna in chu primary level atanga siamthat a, zirtirtute pawhin an fate an luh tir ngam ngei theihna tur khawpa siam chhoh zel an tum thu leh, khaw hrang hranga sub-centre leh primary health centre-te chu hmunpui pan kher ngai lo tur khawpa siamthat an tum thu a sawi bawk.