MNYF president thusawiin mipui rilru a ti na – Congress Thalai

MNF party chu Pathianin Mizote tan a pek ni tiin MNF Thalai president-in a sawi thu Congress Thalai chuan sawiin, MNF-in mipui tan harsatna a siam tawhte chhutin Mizo mipui rilru a ni ta takzet tih an sawi.

Congress Thalai Hqrs. thuchhuak chuan MNF Thalai president Dr L Thangmawia’n MNF chu Pathianin Mizote tan a pek nia a sawi bakah party thenkhat chu a dintute la damlai ngei pawhin hmuh leh hriat tur awm loin an boral a, MNF erawh ralthuam leh sipai chakna hmanga nek ral an tum pawhin Pathianin a chawisang zel tih a sawi a ni tiin, hei hi Mizoram mipui zah lohna leh pawisak lohna lian takah an ngaih thu leh hian Mizoram mipui rilru a tih nat takzet thu a sawi.

MNF an lan a piangin Mizoramah buaina leh manganna nasa tak a thleng ziah Congress Thalai hian sawiin, ‘Mizoram mipuite dinhmun a derthawng a, mipui an rum thin. MNF sawrkar hi Mizoram National Front inti chunga hnam dang uchuak taka duhsak thintu, Mizoram mipui chanai laksaktu a ni a. Inthlana an intiamna SEDP hmanga mipui bumtu an ni tih hi kan ngaihdan a ni. Zalenna sual chhuanlama Mizoram chawkbuaitu leh nunna tam tak ralna, tun thlenga mi rilru tinatu, piangsual leh ram tui lei loa siamtu an ni,’ a ti.

Congress party chu Mizoram mipui tana ding, mipui tana a tiamte pawh party thliar loin, NLUP hmanga tanpui an ni tih a sawi a. Mi tam takin eizawnna an neih phahna, oposition bialah pawh NLUP tanpuina hmanga eizawnna nei ta MNF mi leh sa thahnem tak khawtin, vengtin leh mualtin a taka hmuh tur an awm tih a sawi bawk.

‘Dinhmun chhe taka Mizoram dintirtu MNF sawrkarin mipui zahna nei loa MNF Thalai president-in thu a sawi hian Mizoram hi ruihhlo hmang leh mipui sum hmangin min run nawn leh mek a ni tih mipuiin hrechiang tur leh, 2023 inthlanah Mizoram siamthar a nih leh theihna’n MNF sawrkar hnawla chief minister atan mi dik leh rinawm Pu Lalsawta hruaina hnuaia sawrkar tha din turin mipui kan sawm a ni,’ Congress Thalai thuchhuah hian a ti.