BJP development thlen dan kan hre tan – MBJP vice president

BJP development thlen dan kan hre tan
– MBJP vice president
BJP chu mipui tana development thlentu a ni tih Mizoram mipuiin kan hre tan tih BJP Mizoram vice president R Vanramchhuanga chuan a sawi.
Zirtawpnia an party office-a inkhawmah BJP State vice president chuan Mizoramin kan buaipui tur diktak, mipui thleng phak sawrkar kan neih a ngai tih sawiin, “Mipui sawrkar kan tih thin hi a taka hmangtute chu BJP sawrkarna state-ah zel a ni a, Mizoramah pawh mipui sawrkar, development dik thlen thei leh eirukna do tlattu party BJP kan sawrkar a ngai,” a ti. Prime minister Narendra Modi kaihhruaina hnuaiah India ram chu khawvel hmuhah pawh sang takah a awm tak avangin, BJP kalphung chu system dik leh mirethei kawtkai thleng phak hmasawnna a ni a, Mizoram mamawh party chu BJP a ni, tiin a sawi.
Tunhnaiah hmarchhak state hmun thenkhatah court thuthluknaa sakhaw biak in thiahsak an awm nual tih a sawi a. Chu’ng biak in thiahsak takte chu BJP beih nana hmang party thenkhat an awm tih R Vanramchhuanga hian a sawi. “NE state-a biak in thiahsak kan hmuh ho te kha sawrkar rama biak in sa an nih vang a ni a, thiat tura court-in thu a pekna pawh hun rei tawh tak atanga tih niin, an thiah duh loh vanga sawrkarin court thu anga thiat a ni,” a ti. Mizoramah chuan khatiang thil kha politics khelh nan kan lo hmang thung a, thudik hre hmasa loa tute party emaw propaganda hmanga video darh thin kan lo awih mai zel tih a sawi.
“Mizorama development thlen loh chhan hi, sawrkarna chelhtute bakah kohhran hruaitu thenkhatin sakhuana behchhana politics chungchang an sawi thin vang leh, sawrkar officer-ten an mawhphurhna an hlen tawk loh vang a ni a. Heng zawng zawng hi mahni mawhphurhnaah ngai ngam se chuan ram siamthatna politics dik a thleng ngei ang,” a ti.