Furpui hmachhawn turin inpuahchah

Furpui hmachhawn turin inpuahchah
District Disaster Management Authority Lunglei chu Zirtawpni khan an chairman, bawrhsap Ramdinliani kaihhruaiin furpui lo thleng tura khuarel chhiatna thlen thulha inven dan leh hmalak dan tur ngaihtuahin an thukhawm.
Bawrhsap chuan furpui thleng turah khuarel chhiatna hrang hrang thleng thei laka inralrin leh chhiatna thlen thulha hmalak dan tur ruahmanna fel tak neih a tul tih a sawi a. Chhiatrupna thlen thulha chhawmdawlna a thlen zung zung theihna’n line department tinte lo inbuatsaih lawk a ngai tih a sawi a ni.
Furpui chhunga chhiatrupna thlen thulha inven lawkna chungchangah sawrkar department-te mawhphurna sawi ho niin, fur laia kawng chhiat vanga ration buhfaiah harsatna a awmloh na’n kudam hrang hrangah monsoon stock dah mek a ni a. Medical department-in damdawi in hrang hrangah damdawi leh hmanraw hrang hrang an stock bakah ambulance te hman theiha inbuatsaih tura tih a ni.
PWD chu Lunglei Circle huamchhunga kawngte mipuiin harsatna an tawh loh nan kawng hrang hranga hma lak a ngaihnaah ruahmanna siam tura tih a ni a. NHIDCL-in national highway laihte enkawl tha a, furpui zawh hma chu kawng thar lai lo tur tih a nih bakah Phairuangkai leh Tuichawng lei chu rit phur tam zawk kal theiha ruahman tum a ni.
PHE department-in tui sem chungchangah harsatna em em an neih loh tur thu an sawi a. Pialthleng tui pump-na kawng siamthat kawngah hma lak a ngai tih an sawi thung. Power & Electricity department-in Khawiva leh Kawmzawl Power Sub-Station hman theiha enfiah a nih bakah line check thin a ni tih an sawi a. 132 kV transformer hmanlai leh spare an kawl bakah englai pawhin power supply a khaihlak loh na’n an vil reng tih an sawi.
Tlabung Rural Development Block chhunga tuilianin khaw thenkhat a chim thinte chhanchhuah hna leh chen lailawkna siam kawngah department hrang hrang thawhhona tha tak hnuaiah ruahmanna siam tura tih an ni a. Khuarel chhiatna a thlen thulha mipui himna tur leh biakpawh theihna turin District Emergency Operation Centrer DC office chu 24×7 a inhawng reng tih sawi a ni bawk.