BJP-in chhiatna avanga an member thi an sun

Cyclone Remal avanga nunna chan zing ami Lalrimawii, Maubawk Veng chu an party member a nih angin BJP Mizoram chuan an party office-ah sunna hun an hmang.
Tunkar Thawhlehni khan Lalrimawii hi Lungseia an huanah a riak a, an thlam chhak leiminin hnawlin a thi a ni. BJP member a nih angin Zirtawpnia an State office-a inkhawmah amah sunna hun hi hman a ni.
Tun tum khuarel chhiatna avanga Mizoram-in a tawrh dan kimchang chu Prime Minister Office leh Central BJP office-ah ziak leh tawngka in an thlen a, tanpuina an dilsak a. BJP MLA Dr K Beichhua pawhin BJP Legislature Party leader a nihna angin Prime minister hnenah Mizoram chhiatna thleng chhawmdawlna atan cheng vaibelchhe 1000 a dil sak bawk tih BJP Mizoram president Vanlalhmuaka chuan a sawi.
BJP Mizoram chu kan ram leh hnam tana ding an nih angin, an finna in a phak tawk ang chin chinah theihtawp an chhuah zel dawn a ni tih a sawi a ni.
Khuarel chhiatna tam zawk thleng thin chu sawrkar lam thuneituten mipui mimir himna atana dan awm mekte uluk takin lekkawh ni se, kan him tlanna atana dan siamthat ngaite siamtha in, chu chu khauh takin lekkawh se, chhiatna kan tawh hi zaa 50 vel a tlakhniam theih a ring tih Vanlalhmuaka hian a sawi a. “Sawrkar thuneitute hian hetiang chhiatrupna laka mipui kan him theihna atan lei laih, lung lakna, in sakna tur, tuiluan kawr, leivung paih, bawlhhlawh paihna leh thil dang a kaihhnawih hi a nih tur anga endikin, kan him tlanna kawng min zawhpuiin, mipui himna hi a dah pawimawh tur a ni. Ngam loh leh duhsak bik nei loin sawrkar hi a kal a ngai tawh,” a ti.