Modi-an unemployment sawi lang ngai lo ti

Prime Minister Narendra Modi chuan “mandir-masjid” leh ‘divisive issues’ dang tum 421 lai a sawi lang chungin tumkhatmah unemployment leh inflation a election speech ah tun hnai ni 15 chhungin a telh hauh lo tiin Congress president Mallikarjun Kharge chuan a sawi.
Kumin Lok Sabha inthlanah Kharge chuan rally tum 100 chuang neiin press conference tum 20 a nei a, interview tum 50 a nei bawk a.
Rahul Gandhi chuan rally 107 neiin roadshow, interaction Nyay Sammelans leh Nyay Manch ang te a nei reng bawk a.
Congress general secretary Priyanka Gandhi Vadra chuan public meeting tum 108 neiin roadshow a nei chamchi bawk a, Uttar Pradesh a Rae Bareli leh Amethi-ah campaign ni 10 chhung a nei bawk.
Kharge chuan Opposition tena hmatheha an neih ‘BJP sorkar a sorkar leh a nih chuan democracy nuaibo a ni ang’ tih chu mipui ten an thlawp tiin a sawi bawk a.
“PM leh BJP leader pawimawh rual te chuan theihtawpin mipuite chu sakhuana leh inthenhranna lam hawi hmangin hruai dik loh an tum a ni. Chuti chung chuan mipuite chuan issue thlangin chu mi behchhan chu vote an thlak a. Mipui ten June 4-ah sorkar min pe ngei ang” tiin a sawi.
Congress chief chuan Prime Minister in an party manifesto chu community tihbik nena a thlunzawm lui tlat chu model code of conduct bawhchhiatna piah lamah Prime Minister’s Office zahawmna tihbawrhbanna a ni a ti bawk a.
“Prime Minister hian mandir-masjid, Muslim leh sakhaw dang tum 421 a sawi lang a, society thenhran tumin Election Commission in caste emaw communal feeling lam hawi a khap chungin “Muslim-Pakistan” tih chu tum 224 lai a sawi lang a ni” tiin Kharge chuan a sawi bawk.
Rahul Gandhi pawhin a campaign khar nan video tichhuakin chutah chuan voters, party workers leh INDIA bloc leader te chu Constitution leh institution humhim an duhnaah lawmthu a hrilh a. Opposition party workers te chu counting day last minute thlengin inralring taka awm turin a ti bawk.
“Mirethei, thalai, hna nei lo leh small and medium entrepreneurs te tan vision thar kan siam a ni. INDIA alliance in sorkar a siam dawn a. Leaders leh intellectuals ten Prime Minister chu min debate pui turin an sawm chungin, a ngam lo tlat a ni,” tiin Gandhi chuan a sawi bawk.
Kharge pawhin Prime Minister thusawi thenkhatte chu a duh loh takzet thu sawiin Modi hian Pathian mihringa a inlarna angah a inngai tawh a ti bawk a. Chu mai bakah Modi an Mahatama Gandhi chu Richard Attenborough film hmanga khawvel hriat lar chauh a ti chu a dem thu a sawi bawk a.
“June 4 hnuah hunawl a neih hunah Gandhiji autobiography chhiar rawh se” tiin Congress chief chuan a sawi bawk.
BJP sorkar chu Income-Tax department hmanga Congress leh Opposition party te tax return tihtlai avanga nataka beia party bank account hmang thei lova siamtir tiin a sawisel bawk a. Hei bakah hian Parliament ah pawh Opposition MP rual te hnawtchhuakin bill an pass bawk a. “Heng thil te hian he sorkarin dictatorship a awmzia a pholang a, an tum hmasak ber tur chu Constitution thlak danglam a ni ang” tiin Kharge chuan a sawi bawk.
INDIA bloc leader te chuan June 1 hian Kharge chenna inah inhmukhawmna an nei dawn a, chutah chuan counday day atana alliance joint strategy tur an duang dawn a ni.