BJP-in MNF an hmang mek, Congress MP-in ti

Assam MP (Lok Sabha), North East Congress Co-ordination Committee convener Pradyut Bordoloi-a’n Ningani khan Press Club-ah thuthar lakhawmtute a kawm a, BJP-in MNF an hmang mek niin a sawi.“BJP hian North East mipuite bumna policy a kalpui mek a. Mipuite min thendarh a, kan chunga rorel an tumin kawngkhar hnung lamah rukru angin rawn luh an tum mek a ni. Chumi tur chuan regional party te an hmang mek a ni. Regional party te hi driver ang maiin an hmang a, an hnungah a rukin passenger angin an chuang a, an duh duhna ah an kalpui thin a ni. MNF pawh hi chutiang atan chuan an hmang mek a ni,” tiin thuthar lakhawmtute a hrilh.
Manipur buaina chungchang a sawi a, PM Modi-a’n Manipur buaina a ngaihthah lui nia sawiin, ni 177 lai a ni tawh, mahse Manipur mipuite thlamuan turin tlawh pawh a la tlawh lo a, anmahni tanpui turin pen pawh a la penchhuak lo a ti a, an tuarna te, an hliam te tidam turin a ngaihsak lo a ti bawk. A tih awm chhun chu parliament pawnah second 66 chhung chauh a sawi, a ti bawk.
MNF sorkar hian BJP te inthenhran tumna policy an chhawm nung mek niin a sawi a, North East Congress Co-ordination Committee chuan Mizote leh Zo hnahthlakte inpumkhatna an ngai pawimawh nia sawiin, chutiang hre chung chuan mipiin vote thlak se a duh tih a sawi.
“Keini chuan |ang Puihna te hi kan thlawp a, kalpui turin theihtawp kan chhuah dawn a ni,” tiin Congress party inzawrhna an thlawp thu a sawi.
Chanchinbumite zawhna chhangin Assam MP chuan, Mizoram Lok Sabha MP chuan Manipur buaina chungchang sawiho tura kan nawr lai khan tawngkam khat pawh a chhakchhuak lo niin a sawi a, keini chuan North East mipuite phatsanna nasa tak niin kan ngai a ni, a ti.