BJP-in ZPM lam an awn ang
– Lal Thanzara
Congress tihchhiatna atan BJP chuan MNF aiin ZPM an awn zawk tawh loang tih a sawi theih loh tih Congress vice president Lal Thanzara chuan a sawi.
Zirtawpnia Congress Bhavan-a political session neihah MPCC vice president chuan Mizoramah MNF dinhmun a hniam em avangin Congress party suih tet nan BJP-in MNF chu rintlakah an ngai tawh loa, BJP malsawmna chu ZPM lamin an dawng loang tih a sawi theih loh, tia sawiin, “Congress party tih tlakna’n BJP hian tih hreh an nei loa, chutihrualin sawrkar siam ve hrim hrim tum ZPM hian BJP sum leh pai tanpuina an dawng chak khawp ang. Hetiang hi a lo thleng a nih pawhin Congress mipui tan zamna tur a awm lo, BJP lama tan aiin Pathian lama tan a hlawk zawk a, a tha zawk tih hria ang u,” a ti.
BJP chu Hindu lal ram din tumah puhin Kristian-te tana an hnawksak zia hretute chu kohhran mipui an ni, tiin, hei hi Mizorama Kristian mithiamte pawhin ngaihven lehzual se a duh tih a sawi a. Congress party chu sakhaw tih bik nei lo party a nih avangin nekchepna tuartu Kristiante tawngtaina chu Pathianin a la chhan ngei a ring tih a sawi. “Chutih hunah chuan India ramah sakhaw zalenna chu tundinin a awm leh anga, India rama Kristianten harsatna an tawhin Mizoram chief minister thin Pu Lal Thanhawla kha an thlamuanpui thin hle a, BJP thawhpui Pu Zoramthanga erawh India ram Kristiante thlamuanpui thamin tun thlengin a la che lo,” a ti
MIzoram state nih hnu kum 30 chhunga hmasawnna awm miah lo anga ZPM-in an sawi chu chhanlet tlak a ni loa, mi thil chikmiten Mizoramin kawng hrang hranga hmasawnna a neih chu an hrechiang tih Lal Thanzara hian a sawi a. Kan ram leh hnam ral lo tawkin Pathian kaihhruaina hnuaiah Mizoramin hmasawnna a nei zel tih a sawi a ni.
BJP-in ZPM lam an awn ang – Lal Thanzara
Get real time updates directly on you device, subscribe now.