Zalenna sual kha kan tih tur dik – K Vanlalvena

Zalenna sual kha kan tih tur dik
– K Vanlalvena
Mizoten independent kan sual kha kan tih tur dik tak, kan chanvo chang tura beihna a ni tih MP K Vanlalvena chuan a sawi.
Zirtawpnia MNF office-a inkhawmah MNF National Core Committee member ni bawk K. Vanlalvena chuan MNF founder president Pu Laldenga’n India atangin Mizo mipui hruaichhuak lo mah se, kan rilru a hruaichhuak tih sawiin, “Independent sual kha kan tih tur dik tak, kan chanvo chang tura kan beihna a ni. Independent movement kha awm lo se Vai hmingpu kan tam tawh hle ang. Indian nationalism atangin Mizo nationalism-ah min hruailut a. Kan hnam innghahna kulhpui ber chu Vai ngaihsan lohna a ni ta. Pathian remruat ang zelin, tharum thawha hrehawm tawrh reng remti loin, remna kawngah min hruai ta a ni,” a ti.
Roreltute chu Pathian ruat an ni tih Bible-a inziah thu sawiin, “Hei hi tunhma atanga tun hun leh hun lo la awm tur thlengin a dik dawn. Mizoram politics-ah pawh Pathian min hruaina a dik chat chat zel a ni. Kan hun tawn azir zelin Pathianin roreltu min pe thin,” a ti.
Covid avanga state economy tlakhniam zia chu a raptlak takzet tih Rajya Sabha MP hian a sawi a. Khawvel ram ropuite pawh an talbuai thu leh Mizoram ngeiah pawh mipui kan rethei a, kan la tuar mek tih a sawi. “Kan sawrkar leh dan tur ngaihtuahna ai pawhin mipui retheihna dawmkan dan tur kan ngaihpawimawh hmasak zawk a tul a ni,” a ti.