BJP leh a thuihhruaiten Bengal, Assam leh Puducherry-ah sorkarna chang thei, Kerala-ah Cong kaihhruai UDF, Tamil-ah TVK

India-a state pali – West Bengal, Tamil Nadu, Kerala leh Assam leh union territory pakhat, Puducherry-ah vote tlate chu ruahman lawk angin Thawhtanni khan chhiar a ni a. A lan dan leh hmahruai dan dinhmun atang chuan Prime Minister Narendra Modi-a kaihhruai BJP chu Assam leh West Bengal-ah nasa taka hma sawnin sorkar pawh an sam ngei dawn niin a lang a. Puducherry-ah pawh anmahni telna tangrual pawlin thuneihna an chang leh dawn niin a lang bawk.
West Bengal-ah hian chief minister ni mek, Mamata Banerjee-i kaihhruai Trinamool Congress (TMC) chu a zawna term thum an sorkar hnuah a chak lo zawkah an tang dawn niin a lang a. Hei hian kum 2029-a ram pum inthlan neih turah eptu pawl tangrual pawh a tichak lo thei dawn niin mi thiamte chuan an sawi.
Tamil Nadu-ah lemchang thiam, politic-a zuang lut ta, Chandrasekaran Joseph Vijay-a kaihhruai party thar, Tamilaga Vettri Kazhagam (TVK) chuan nasa taka hma hruaiin tual chhunga a elpui leh party hlun tak takte a paih thla dawn.
Kerala-ah chuan a hmaa thil awm dan atanga a lan dan chuan Congress kaihhruai United Democratic Front (UDF) chuan hian Left party tangrual pawl, term hnih a zawna state enkawl tawh, CPI(M) leh Pinarayi Vijayan-a kaihhruai Left Democratic Front (LDF) chu an hneh hmel bawk.
Thawhtanni tlai dar 04:00 thlenga Election Commission of India (ECI)-in an website-a inthlan result an tar lanah chuan Assam-ah bial 126 inthlanah BJP-in bial kua la tawhin bial 72-ah chak mai rinawm takin hma an hruai mek a. A zawna vawi thum nan sorkarna an siam leh hmel.
Bodoland People’s Front (BPF)-in bial khat la tawhin bial kua dangah hma an hruai a. Eptu party lian ber, Congress chuan bial 20-ah hma hruaiin bial lak erawh an la nei lo.
Kerala-a bial 140 inthlanah Congress chuan bial 30 la chiang tawhin bial 34 dangah hma an hruai mek a. CPI (M)-in bial 14 lain bial 11-ah hma an hruai a. UDF-a tel, Indian Union Muslim League (IUML)-in bial sarih lain bial 15-ah hma an hruai a. CPI leh UDF-a tel dang, Kerala Congress (Nationalist) chuan bial li ve ve an la tawh bawk.
Puducherry-a bial 30 inthlanah BJP thawhpui, All India NR Congress chuan bial kuaa hnehna chang tawhin bial khatah hma an hruai mek a, saffron party-in bial hnih la tawhin bial thum dangah hma an hruai a. Independent-a chak pathum awm tawhin DMK leh Congress-in bial khat ve ve an la tawh bawk.
Tamil Nadu-ah bial 234 inthlanah TVK chuan bial hnih la tawhin bial 104 dangah hma an hruai mek a, DMK-in bial thumah hnehna chang tawhin bial 57 dangah hma an hruai a, Congress-in bial khat la tawhin bial li dangah hma an hruai a. ADMK-in bial lak la nei lo mah se bial 46-ah hma an hruai mek.
West Bengal-a bial 294 awma 293 chhiarah BJP-in bial li la chiang tawhin bial 194-ah hma an hruai mek a, sorkarna an chan ngei a rinawm hle a. Rorel lai, TMC-in bial khat la tawhin bial 88-ah hma an hruai ve thung bawk.