Telangana CM thar tur politics zinkawng ngaihnawm

Politics-a theih loh tia sawi te inhnehtir duh miah lovin Telangana Chief Minister thar Anumula Revanth Reddy chuan India rama State naupang berah top post a chelh dawn ta.
Thatho tak, tum nei sang tak niin tichung chuan kum 17 politics a khelh tawhah ruling party-ah a la awm ngai lo va, administrative post chelh a la nei ngai lo bawk a. Mahse, politics-a dinhmun sang chelh a duhna leh tumna a bansan ngai lo. Chung kum zawng zawngah chuan suangtuahna chu a takah a chantir thei tih ngaihdan nei tlattu a ni.
BRS sorkar paihthlak a nih theih nan Congress beiseina eng ni theiah a inngai tlat bawk a. Chung hunlai chuan K. Chandrashekhar Rao chu hneh theih loh anga ngaih niin tumahin hneha a awm pawh an ring lo ang tih tur a ni.
Chief Minister nih chu electoral politics a luhchilh hma leh Akhil Bharatiya Vidyarthi Parishad (ABVP)-a a tel lai pawhin a tum ber a ni a, mahse, ABVP ah tel mahse Bharatiya Janata Party (BJP) chu a zawm miah lo thung.
Inthlanah erawh a che thei thin hle. Politician lawk leh hlun, sumdawng hausa leh movie star te chenna Jubilee Hills Cooperative Housing Society dahsan em emah pawh committee member atana thlan tlin a nih kha inthlan lama a sulhnu neih hmasak ber a ni a.
Telangana a Congress vanglaiin kum 2006 khan Mahabubnagar a Midjil ah Zilla Parishad Territorial Council (ZPTC) inthlanah independent in chakna a chang tlat bawk. Chumi hnuah chutih laia official Congress candidate Chief Minister Y.S. Rajashekhara Reddy chu Member of Legislative Council (MLC) local body election-ah a hneh bawk.
Thusawi thiam tak niin Telangana dialect a thiamna chuan TDP chief N. Chandrababu Naidu beng thlengin TDP zawm turin a thlem a. Risk lak inpeih at reng Reddy chuan Y.S. Rajashekhar Reddy an Congress zawm tura a sawmna hnawlin TDP chu a zawm ta zawk bawk.
Kum 2009 khan Kodangal-ah MLA inthlanah Congress MLA term nga chelh tawh Gurunath Reddy a hneh a. A hnuah TRS (tuna BRS) chief K. Chandrashekhar Rao chuan kum 2009 khan TDP nen thawhhona an siam a, Reddy chuan Mahbubnagar a Parliament member ni tura KCR dinin a tana thawktu ber a ni bawk.
Kum 2014 inthlanah TDP candidate niin a chak leh a, State thenhran a nih hnuah Telangana TDP president a ni zui a. Naidu chu Andra Pradesh lamah kalin Chief Minister a nih zui bawk si avangin Telanagna-ah TDP chuan hma lam hun a nei vak lo tih hriain Reddy chuan kum 2017 khan Congress a zawm ta a ni.
TRS wave nasa tak karah kum 2018 khan TDP candidate niin a chak lo va, chumai bakah KCR chuan Reddy tlin loh nan hian a theihtawp a chhuah tih a ni bawk. Mahse, a hnu thla li lekah Reddy chu Malkajgiri constituency atangin parliament member atana thlan tlin niin AICC leadership nen an inhnimhnai zui ta a ni. Assembly inthlana a chak lohna tur tuna a dinhmunah hian a hlangkai zawk tiin a sawi.
Mahse a tun dinhmun thleng tur hian kawng awlsam a zawh hauh lo. Kondareddipalli thingtlang khua tereuhtea seilian niin first-generation politician a ni a, agricultural family ah November 8, 1969 khan a piang a, unau pasarih zinga pali-na a ni. An khuaah erawh an chhungkua an hung a, an langsar em em thung, landlord an nih piah lamah powerful tak ‘police Patel’ post chelh an ni bawk. Unau hmeichhia a nei chungin Mulugu MLA Dasari Anasuya (Seethakka) chu Pathianina unaunu tura a pek tiin mipui hmaah a sawi mai thin bawk.
A political career a duhawm lo tak awm chhun chu TDP candidate Vem Narender Reddy an kum 2015 a MLC inthlana chakna a chan theih nana nominated MLA stephenson vote lei a tum Anti Corruption Bureau in an man phahna chu a ni.
Chuvang chuan thla khat lung inah a tang a, a nuna hun thim ber niin a lung in tan chhungin a fanu neih chhun Nymisha pasal neiha a tel theih nan darkar 12 bail-a a chhuah tih chauh loh chu a tang tluan zak a ni. Chumi tum chuan TV camera hmaah khatih laia Chief Minister KCR chungchang sawia ‘Ka hun a la thleng anga ka chakzia ka la lantir ang’ a tih chu Telangana mipui tena an hriat lar leh fiah em em a ni.