BJP sawrkarin Mizoram a vur nasa – Nirmala Sitharaman

Centre-a BJP kaihhruai sawrkar chuan India hmarchhak, Mizoram telin hma an sawnna turin sumin a pui nasa tih Union Finance minister Nirmala Sitharaman chuan a sawi.
Lok Sabha inthlan atana Siaha-a langa rawn campaign Nirmala Sitharaman hian Nilaini khan Delhi a pan leh hma in Lengpuiah thuthar thehdarhtute a kawm a. Kum 10 kalta chhung khan Prime minister Narendra Modi chuan hmarchhak state ngaihsak bikna hrang hrang a siam a, central minister-te an hna chanpuala hmalakna bawhzuiin hemi kum chhung hian tum 850 hmarchhakah an kal tih a sawi.
Kum 2004 atanga 2014 inkara Congress kaihhruai sawrkar leh 2014 atanga 2014 March thlenga BJP kaihhruai sawrkarin Mizoram a vur dan Union Finance minister hian a khaikhin a. 2004 – 2014 inkarah Mizoramin central atangin cheng vaibelchhe 4734 a hmuh laiin, 2014 atanga 2024 inkarah vbch. 32823 a hmu a, grants dangah a hmaa sawrkar atangin cheng vbch. 21358 hmuh a nih laiin, BJP sawrkar hnuaiah vbch. 43104 hmuh a ni tih a sawi.
PM-in hmarchhak mite a duhsak viau lai hian, mipui tana central scheme hrang hrang siam chu hre lo leh hmang tangkai lo an la tam tih a sawi a. Hemi atan hian BJP aiawh MP neih chu a pawimawh lehzual dawn tih a sawi a ni.