MP thlang turin inpeih fel Campaign phal a ni tawh lo

1-Mizoram (ST) Parliamentary constituency hnawhkhahna atana Lok Sabha inthlanpui nei tura inpuahchahna chuan a vawrtawp a thleng a, inthlang turin Mizoram a inpeih ta. Hetihlai hian April 17 tlai dar 5.00 atang khan ‘silence period’ a intan a, campaign lam kaihhnawh reng reng neih phal a ni tawh lo.April 19-a vote thlak turah polling station 1276-a inthlan buaipuitu tur polling party-te inpeihfel tawhin polling station lam hla deuh 168-a duty turte chu Nilaini khan an chhuak a. Vawiin – Ningani hian a hnaivai deuh polling station 1108-a duty turte an chhuak veleh ang. Vote thlak nia duty tur polling official ruat mi 5071 an awm a ni.
Electoral roll thar berah Mizoramah vote nei 856364 an awm a, heng zinga 414805 chu mipa niin, hmeichhia 441559 an awm. Service voters 4963 (mipa 4872, hmeichhia 91) an awm bawk. Kum 85 chunglam voters 4741 (mipa 2167, hmeichhia 2574) awmin PwD voters 3397 (mipa 1876, hmeichhia 1521) an awm a, young voters kum 18-19 inkar 36370 (mipa 18659, hmeichhia – 17711) an awm a ni.
April 19-a vote thlak tur Lok Sabha inthlan atan vote thlak hun chhung atanga chhiarleta darkar 48 hma, April 17 zing dar 5.00 atanga April 19 tlai dar 5.00 thleng, political party leh candidate te chu campaign phal a ni tawh lo. Hemi chungchangah hian chief eletoral officer bakah district election officer tinte chuan hriattirna an tichhuak a ni.
8 Constituency pawn (Mizoram pawn) atanga campaign tura lokal, chu constituency-a vote nei si lo te chuan constituency an chhuahsan tawh tur a ni.
8 Aurinna (loudspeaker) hman phal a ni tawh loa, district magistrate-in khapna thupek Section 144 CrPC hmanga a chhuah chu zawm vek tura tih an ni.
8 Section 126 of the Representation of the People Act 1951 sawi angin, electronic media/ social media leh a tlukpui dangte ah inthlan kaihhnawih, mipui rilru sukthlek tidanglam thei thil tarlan/ chhuah phal a ni loa, dan zawmlo te chu kum hnih thleng lung in tan emaw sum chawi emaw sum chawi leh lung in tang tura hrem theih an ni.
8 Candidate emaw party tin ten chi leh chi, sakhuana, hnam leh hnam leh a dangte inkar boruak tichhe thei lam hawiin engmah ti lo tura tih an ni a. Political party dangte sawiselna a nih pawhin, party policies, tunhma huna an hnathawh dan (past record and work) lam hawi chauh tih tur a ni.
8 Midang mimal nun tibawrhbang leh timualpho zawngin statement siam emaw mimal thil (personal life) chungchangah inchirh theh zawnga thil tih loh tur a ni.
8 Vote hmuh theihna turin communal feeling (chi leh chi inkar boruak) tichhuak zawngin engmah ti lo tura tih an ni a. Biak in, mosques, temple leh Pathian biakna hmundang, election propaganda atan hman loh tur a ni.
8 Hemi hun chhung hian Flying Squad Team, Static Surveillance Team adt. dan bawhchhiatna a awm leh awm loh an fankual reng dawn bakah Media Certification & Monitoring Committee-in media leh social media ngun takin an vil dawn a ni.