BJP te paihthlak nan inhmukhawm

Communist Party of India (CPI) General Secretary D. Raja chuan secular democratic party te chu tangrual vekin kum 2024 general election huna BJP te hneh an nih theih nan hma an la tiin a sawi.
Raja chuan India ram dinhmun chu duhawm lo leh ngaihthlak nuam lo a nih thu sawiin democracy vang tal pawhin saffron party te chu phawi an ngai tiin a sawi bawk a.
“Secular democratic party tin ten BJP te hneh an nih theih nana tanrual ngaiah an ngai a ni. Hei hi thuneihna chan duh vang a ni lo va, Constitution leh democracy humhim nan ram leh a hma lam hun atan a ni a, chu chuan hmasawnna a hmu mek a ni,” tiin Raja chuan a sawi bawk a.
“Tu nge kaihruai anga hruaitu ni ang tihah buaina tur a awm lo. Engkim mai sawiho vek theih niin party tinte puitling tak vek an nih avangin a huhova thutlukna siam a ni ang,” tiin a sawi bawk.
“A hma pawhin hlawhtling takin kalpui a ni tawh a, United Front din niin inthlan zawhah leadership chelhtu tur chu chinfel a ni mai. Common Minimum programme pawh sawiho niin pawm a ni mai a, harsatna a awm lo. Engkim mai fel fai takin a kal vek mai a, secular democratic party te thawhhonaah intiamkamna hmasa a awm ve lo,” tiin Raja chuan a sawi bawk.
Veteran leader chuan June 23-a Patna-a opposition meeting neih turah CPI aiawhin a kal tur thu sawiin he meeting-ah hian State hrang hrang chief minister leh party hrang hrang hruaitu lawkte an tel tur thu a sawi a.
Meeting hi Bihar Chief Minister leh Janata Dal (United) leader Nitish Kumar koh niin kum 2024 Lok Sabha poll atana anti-BJP strategy tur duanna tur a ni.
Raja chuan Rashtriya Swayamsevak Sangh (RSS te chuan safforn party te chu an agenda kalpui tir lo thei lovin an siam a ti a, hei vang hian Dalits, minority, hmeichhia te ram chhung hmun hrang hrangah beihin an awm tiin a sawi bawk a.
“BJP tena thuneihna an chan veleh RSS te chuan huaisar takin sorkar chu an agenda kaltir ngei an tum bur nghal a. Hei vang hian minority, Dalits, Adivasi leh hmeichhia te thlurbing bika beihna kan hmu reng a. Public sector te namthluk niin privatised a ni a, sorkar chuan langsar takin corporate house lian te thlawpin parliament meuh pawh chuangtlai angin an siam a ni,” tiin senior leader chuan a sawi bawk.
Parliament session hnuhnung berah pawh khan opposition te chuan Adani issue an sawi chhuak thei miah lo a ti bawk a. “Sorkar chu luhlul leh invaivung takin a kal a, opposition tena an ngaihmawh an sawi pawh a rem ti lo,” tiin a sawi bawk.
Manipur buaina thleng mekah Raja chuan BJP te chu northeastern state a tharum thawhna tichhuaktu tiin a puh bawk a. May 3 atanga Manipur buaina avanga nunna chan 100 chuang awm tawhnaah Prime Minister Narendra Modi ngawih chuh reng chu a sawisel na hle bawk a.
“Modi ngei hian double engine sorkar chuan State hrang hrang Manipur telin hmasawnna lian tak a thlen mek a ti a. Mahse, thil awm dan en teh u. Sorkar hian political party tin te a ngai pawimawh tur a ni a, remna leh muanna a awm theih nana hma la tur a ni a. Tuna buaina hi sorkar siam a ni,” tiin a sawi bawk.
Senior CPI leader chuan tunlaia Indian wrestler tena lungawilohna an lantir zui zel chungchang pawh sawiin, “Ram tana chawimawina lo hawntu wrestler te hi en teh u. Modi hian tawngkam khat pawh sawi a la nei lo. BJP sorkar hian sorkar tha a thlen hauh lo va, ram pumah BJP ngaihnatlohna a awm zawk a ni,” tiin a sawi bawk a.
Bharatiya Janata Party (BJP) te chu Jharkhand, Delhi leh Tamil Nadu state ah te democratic hmanga mipuite thlan tlin sorkar hmanrua an neih tinreng hmanga nghaisa tiin a sawi bawk a. “Modi leh a sorkar hian opposition party leh non-BJP sorkar te chu vau zam tumin a bei a ni. Chutiang chuan mipuite fuihpawrh theih pawh a inring a, mahse, mipuite hi an puitling em a, Modi sorkarin ram a khawih dan hi an hrefiah khawp mai,” tiin Communist Party of India (CPI) General Secretary D. Raja chuan a sawi bawk.