Blackburn in Leicester hnawtchhuak

February 28, Thawhleh zan khan FA Cup fifth round khelh a ni a. Premier League club Leicester City chu championship club Blackburn Rovers hneh lovin an mualpho a, an tualzawlah ngei an tlawm. Inkhel dangah champion tura rinkai Manchester City chuan Mimualah awlsam takin hnehna an chang ve thung.
An mualah Foxes an tlawm
Season kal meka beisei phak lo zinga mi, EPL-ah 14-naa awm mek Leicester City chuan King Power Stadium-ah championship club Blackburn Rovers an mikhual a. Hnehna chang a, round sang zawk lut ngei tura ngaih an nih laiin championship club lakah an tlawm a, an mualpho ta tlat thung.
King Power stadium-a lenglut Blackburn hian beisei phak bakin EPL club lakah an khel tha a, Mimuala inlan mah nise an buai lo. Minute 33-naah mikhual team Blackburn tan hian Tyrhys Dolan chuan hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah Blackburn Rovers an khel tha chhunzawm a, goal thun hmasa zawkah an tang leh. Minute 52-na lekah Sammie Szmodics chuan an goal hnihna a thun a, an hamhruaina a tizau. Goal hnih ngawta hma an hruai vangin chak turin inrintawkna sang zawk an nei a. King Power stadium-ah phur takin an inlan.
An mikhual lakah goal hnih an chhuah hnuin Foxes hian an si phurh sut ngei tumin tan an khawh zui chiam a, an khingpuite an nawr na bawka goal an thun thuai, Minute 67-naah Kelechi Iheanacho chuan Barnes siamsak atangin an si phurh sut thenna goal a thun. An si phurh an sut then hnu hian goal dang thun belh tumin tan an khawh zui chiam a, an mikhual lakah tlawm pumpelh hram tum mah se goal dang an thun belh thei lova, an mualah ngei tlawmin, FA Cup atangin an tla a, an puanthuah an tel zui ta a ni.
City an chak nuamsa
Championship club lakah Leicester City an mualpho laiin champion tura rinkai Manchester City chu mualneitu Bristol City lakah nuamsa takin an chak ve thung.
Manchester City hi Bristol City hmachhawn turin Ashton Gate-ah an leng lut a. Championship club lakah hian tha taka bul tanin, goal an thun hma hle. Inkhel tan atanga minute 7-na lekah Phil Foden chuan Riyad Mahrez siamsak atangin hmahruaina goal a thun. Team lian zawk leh chak tura rinkai zawk City in hma takah goal an thun vangin championship club tan chet a harsa leh zual a, goal hnih an chhuah zui ta hial bawk.
Minute 7-na lekah Foden-an goal a thun hnu hian goal lut a awm belh thei lo vang vang a, goal thun belh turin City ngei pawh hian an nghak rei hle. Minute 74-na daihah hmahruaina goal thuntu Foden bawkin goal a thun nawn leh a, an hmahruaina a tizau. Si hnih faia hma an hruai hnu hian hun tawp dawn hnaihah Kevin de Bruyne chuan minute 81-naah Jack Grealish siamsask atangin an goal thumna a thun a, an chakna a nemnghet. Tichuan, inkhel tawp thlengin goal dang a luh belh thei tawh lova, City chuan Mimualah si thum faia hnehna an chang ta a ni.
Fulham leh Brighton an chak
Thawhleh zana FA Cup inkhel dangah Premier League club pahnih Fulham leh Leeds United an inhmachhawn a. EPL-ah paruknaa awm mek Fulham chuan Graven Cottage-a an mikhual Leeds lakah si hnih faiian hnehna an chang a, quarter-final an lut.
Fulham tan hian João Palhinha chuan minute 21-naah hmahruaina goal a thun a. Second half tantirh lamah Manor Solomon chuan an goal hnihna thun belh lehin an chakna a nemnghet a, an mualah si hnih faia hnehna changin quarter-final an inhlangkai zui ta a ni.
Fulham in an mualah hnehna an chan lai hian Brighton chuan Mimualah championship club Stoke City an hmachhawn ve thung a. Brighton hi an lenluhna bet365 Stadium-ah khel tha viau mahse goal an thum tam thei lo. Ball chang tam leh hlauhawm siam tak zawk ni bawk mah se an hun tha nei an hlo fo a. Chuti chung chuan minute 30-naa Evan Ferguson goal thun an chakpui ta tho a ni