Hong Kong-in ni 845 hnuah hmaituam hlih remti

Hong Kong chuan hmaikawr vuah ngei ngei tura tihmakmawh chu hlipin khawvela Covid khuahkhirhna kalpui rei ber zinga tel a ni.
Hong Kong-ah virus thununin a awm tawh a, inkaichhawn nasa a awm tawh lo tiin city leader John Lee chuan a sawi a.
Hmai tuamna vuah ngei ngei hi July 2020 atanga tan kha niin ni 845 lai kalpui niin hmaituamna vuah lote chu $640 chawitir hial thin an ni.
“Thupek hlih a nih hnuah Hong Kong chu a pangngaiin a kal leh dawn ta” tiin Lee chuan a sawi a. “Kumin leh kum lo la kal zel turah economy leh hmasawnna tichak turin theihpalingkawhin tan kan la ang,” tiin a sawi bawk.
A hma zawng Nilaini thleng khan Hong Kong-a chengte chuan chenna In an chhuahsan dawn emaw pawna an chhuah dawn reng rengin hmai tuamna an vuah ngei ngei a ngai a ni.
Mi tam takin an sawisel chungin sorkar chuan khauh takin a kalpui tho va, mi tam tak chuan ngaia neiin an la hmang zui tho thung.
Hmaituamna vuah mai hi a ni lo va, Hong Kong chuan mainland China a kalpui dan ang thova kalpuiin quarantine rules, mipui pungkhawm thei chin bithliah te thlengin a kalpui reng a. Mahse, nikum kum tawp rual khan khuahkhirhna nasa tam tak chu a hlip tawh thung.
Hong Kong tlawh tura foreigner te hip khawm leh nan Nilaini atang khan sorkar chuan air ticket a thlawnin maktaduai zahve a pechhuak bawk.
Asia khawmualpui bikah hmaituamna te chu nasa taka la hmanzui reng tho niin South Korea-ah chuan public transportation bakah hospital leh pharmacy te tlawh dawnin hmaituamna la hman ngei ngei tur a ni thung.
Japanese sorkar pawhin 13 March ah hmaituamna hman khuahkhirhna a siam chu a phelh thawl tur thu a sawi chauh bawk a, hmaituamna te chu rel leh bus-ah te mipui tam lai chuan hman tur a la ni reng ang a ti thung a. Japan ah hian hmaituamna hman chu tihmakmawh a ni lo chungin mipui tam ber ten an hman a ni thung.