BLACKPINK-in vawi khat concert-a sum lalut tam record an siam

South Korean hmeichhe group BLACKPINK chuan record an siam leh ta, Lisa, Jennie, Jisoo leh Rose te hi K-pop star mai an ni tawh lo, khawvel huapa star an ni tawh tih a chiang e, vocal group zinga vawi khat concert atanga sum lalut hnem ber record an siam tlat mai.
August ni 18 khan BLACKPINK hi Las Vegas-a Allegiant Stadium-ah an concert a, he show vawi khat an neihah hian dollar maktaduai 11.429 an hmuchhuak thei a, hei hi rimawi khawvel history-ah vocal group zinga vawi khat concert atanga sum hmuchhuak hnem ber record a nih thu Guinness World Record-in an puang.
BLACKPINK hi Pacific tuipui ralah pawh an hlawhtling hle a, Australia-a show tum hnih an neih pawh a hlawhtling hle a, Qudos Bank Arena, Sydney leh Rod Laver Arena, Melbourne-ah te pawh vawi khat show neihah dollar maktaduai 4.7 leh maktaduai 4.1 an hmuchhuak thei tlat. Tihian Oceania-a hmeichhe group tour nei tawh zinga sum hmuchhuak hnem ber niin, show vawi hnih an neihah ticket 49,071 hralhin, dollar maktaduai 8.8 an hmuchhuak thei a ni.
BLACKPINK hian Born Pink world tour an nei mek a, he tour atang hian dollar maktaduai 281 hmuchhuak tawhin, vawi khat concert-ah dollar maktaduai 4.6 vel zel hmuchhuak ang an ni.