Blinken-an China thuneitu sangte hmu

US Secretary of State Antony Blinken chuan senior Chinese officials nena inbiakna neiin inbiakna neih zel remti dunin mahse tun hnaia ram pahnih inkarna tichhetu chungchangah erawh an la sak dun hle.
Blinken hian China top diplomat Wang Yi chu darkar thum dawn titina hun a nei a ni tiin US official te chuan an sawi a. Blinken leh Wang te hian a hnuah engmah thuchhuah intawm emaw siam pawh an nei lo bawk.
China’s Ministry of Foreign Affairs chuan thuchhuah an siamah “Wang Yi chan Secretary of State chuan China-US inlaichinna kawng pengthuama awm laiin Beijing a pan a, inbiakna nge inbeihna, thawhona nge inbakaihna tia duhthlan ngai a ni,” tia sawiin “US chuan China lakah ngaihdan dik lo tak neiin chu chuan China laka policy dik lo kalpui phahna thlenin chu chu inlaichinna tibaltu a ni,” a ti bawk.
US chuan “China-US inlaichinna chhiat lam pan mek zel siamthaa hrisel leh ngelngheta siam thei turin mawhphurhna a nei,” tiin a sawi zui bawk.
A hma pawhin China a thlen hnuah Blinken leh US official dang te chuan inbiakna neih tur chuan khawvela economy lian ber pahnihte inkarah rah tha a chhuah nghal thut an beisei loh thu an lo sawi lawk tawh thung a. Chu ai chuan ram pahnihte chuan inbiak pawhna tha nei leh siam chu tun atana tihmakmawh hmasa angin an sawi a ni.
State Department pawhin thuchhuah a siamah Blinken chuan ‘Inelna tena inbakaihna a thlen loh nan United States leh PRC te chuan inhawng taka inbiakpawhna tha an neih a ngai a ni’ tiin an sawi bawk.
Pathianni khan Blinken chuan Chinese Foreign Minister Win Gang chu darkar ruk dawn a titipui tawh bawk a, chutah chuan ram pahnih hruaitute chuan high-level discussion neih chhunzawm zel ni se an ti a. Mahse, engmah resolution han siam meuhna tur khawpa chinfel erawh a awm lo thung a ni.
Qin chuan Blinken an Washington tlawh tura a sawmna a pawm thu sawiin mahse Beijing chuan chiang takin “China-US inlaichinna chuan a hniam ber lai a thleng mek,” tiin a sawi thung a, hei hi US officials te pawhin an sawi dan chiah a ni bawk.
State Department chuan Blinken chuan ‘Diplomacy leh inngaihhaina leh chhut fuh loh thil te a awm zual zel loh nana inbiak pawhna tha leh inhawng tak neih a tul’ tia a sawi thu an sawi bawk.
Chinese-te chuan tuna ram pahnih inlaichinna chu ram pahnih mipuite tan mai ni lo international community tena an beisei ang a ni lo tiin Foreign Ministry thuchhuah chuan a tarlang bawk.
Blinken hi President Joe Biden an thuneihna a chan hnua American official China tlawhtu dinhmun sang ber niin February thlaa kal tum tawh zawk kha niin mahse US ram chhunga Chinese surveillance balloon kahthlak a nih avangin a thulh thut a ni.
China leh US inbakkaihna zingah hian Taiwan chungchang a, China ram chhunga human rights bawhchhiat chungchang te, Hong Kong mai bakah Chinese sipai tena South China Sea an hual dan te leh Ukraine-a Russia indona chungchangte a tel a ni.
Inbiakna neihnaah hian Blinken chuan China chu American khua leh tui a man te chhuah zalen tura turin leh fentanyl US a an thawn luh opoid crisis thlentu chu titlem turin a ngen bawk a.
Blinken chuan ‘United States chuan American mipuite interest leh values te dinchanpui zel dawnin leh a thawhpui ram te nena khawvel zalen, international rules-based order a awm theih nan a bei zel dawn’ tiin a sawi a.
Chinese Foreign Ministry chuan chhang letin “China chuan US-in China a ngaihdan a thlak kan beisei a, China-US inlaichinna political foundation dinchantirin hma a lak kan beisei,” an ti ve thung.
Blinken-an China a tlawh hma hian high-level meeting neih fo tawh niin May thla khan CIA chief William Burns pawin China a tlawh a, China commerce minister pawh US tlawhin US national security adviser Jake Sullivan leh senior Chinese foreign policy adviser Wang Yi te pawh May thla khan Vienna-ah an inhmu tawh bawk.
Mahse, tun thla tir lam khan US Defense Secretary Lloyd Austin an China Defence Minister hmuh a tumna chu hnawlin a awm thung a. Mahse, Lloyd Austin chuan eng hunah emaw inhmuhna an neih theih dun ngei a beisei thu a sawi thung.