Antidepressant ei rei hlauhawm hle

England-ah ringawt antidepressant damdawi ei maktduai hnih vel awmin kum nga chhung chu chhum lo chat lovin an ei tawh tia sawi a ni a.
Antidepressant damdawi te hian hun rei tak ei chuan thatna a nei lo hle tih finfiah a ni tawh chungin mi tam tak chuan ngaiah neiin a tel lovin an awm thei tawh lo tluk a ni bawk.
Hei mai bakah hian he pills ei te hian awlsam takin an thlah mai thei lo bawk a, withdrawal symptom nasa tak awmin chuvang chuan thlah mai an harsat hle tih a ni bawk a. Kum 2019 daih tawh khan England-a NHS chua withdrawal guidance a tichhuak tawh chungin thil inthlak danglam a la tlem hle tih a ni bawk.
England-ah hian antidepressant damdawi ei maktaduai riat vel an awm tia sawi niin he damdawi hi depression, anxiety leh obsessive compulsive disorder te enkawlna atana hman a ni a.
Zirchianna BBC tena an neihah drug company lian te chuan kum 27 kal ta daih tawha he damdawi ei reng tena an ei loh thuta harsatna an tawh theih nasat dan te chu an thup tia sawi a ni bawk.
Modern antidepressant te hi SSRIs (Selective Serotonin Re-Uptake Inhibitors) tih niin kum 1980 vela siam chhuah niin chung zingah chuan prozac pawh a tel a. A hnu lawkah wonder drugs tih hial niin mahse a thente chuan side-effect an nei nasa hle thung.
Thluaka mood siamtu thununtu ber chemical setononin thunun thei a nih avangin depression enkawl nana hman a ni thin a. Researchers te chuan heng damdawite thawh dan hi kimchang zawka hrefiah tawhin theory pakhatah chuan harsatna mihringin a tawh chhan tak tihdam emaw siamthat aiin mihringin a thil thlir leh ngaihdan a thlak thleng zuai chauh an ti.
NHS te chan antidepressant hi depression nei nasa tak te enkawl nan chauha hman tur a ti a. Damdawi dangte nena chawhpawlh lovin exercise leh lifestyle thlak danglama hmalakna nena kalpui tur an ti bawk.
“Career hun rei tak ka neih tawh chhungin mi tam tak antidepressant avanga hlawkna tawng ka hmu a ni,” tiin Prof Wendy Burn, Royal College of Psychiatrist president hlui chuan a sawi a. “Clinical practice ka neihah te antidepressant avanga an nun a tha lama inthlak te ka hmu a ni,” a ti a.
“Mahse, miin antidepressant a ei rei lutuk chuan eng nge nghawng a neih zirchianna tak tak kan la nei lo,” tiin a sawi.
Antidepressant that leh that lohah inhnialna nasa leh rei tak a awm tawh a, University of Oxford tena zirchianna an neihah chuan antidepressant chuan hun eng emaw ti chhung chu thatna a nei an ti.
Mahse, hun rei tak ei chuan antidepressant chuan hriselna lamah nghawng dang dang neiin chung zingah chuan heart problem leh diabetes te pawh a tel a, chu mai bakah nghei duh mah se nghei an harsat nasa tawh tih a ni bawk.