Board of Peace-a telten Gaza tan $ tld 5 thawh tawh

Board of Peace-a telten Gaza
tan $ tld 5 thawh tawh
US President Donald Trump-a chuan Ningania a vawi khat nana inhmu khawm tur, Board of Peace member ramte chuan Gaza tun din leh nan leh a chengte puih nan $ tluklehdingawn 5 thawh an tiam tih puan a ni dawn tih a sawi.
Pathiannia Truth Social-a a tar lan danin Trump-a hian a tel ramte hian UN thuneihna hnuaia Palestinian-te chenna hmuna stabilization force leh police tur sang tel tirh an inhuam bawk.
US president hian Ningania inhmuh khawm hi Donald J. Trump Institute of Peace-ah neih a ni dawn tih a sawi a, a hmun hming hi State Department thin niin tun hnaiah president hming chawiin thlak a ni a. Ram 20 chuanga an hotu lu ber ber an tel tura ngaih a ni.
Board hi Trump-a sorkarin Gaza-a Israel leh Palestinian Islamist pawl, Hamas indona titawp tura hma a laknaa tel, UN Security Council pawhin a pawmpui a ni.
Israel leh Hamas hian nikum October atang khan inkahhai an puang tawh a, ni tin a bawhchhiaa inpuhna erawh a awm a. Gaza-a health ministry chuan inkahhai hnuah Israeli sipaiten Palestinian 590 chuang an that leh tawh niin an sawi a. Israel pawhin Palestinian helhovin an sipai pali an that tawh niin an sawi ve bawk.
Hetih lai hian Middle East-a ram chak tak tak – Turkey, Egypt, Saudi Arabia, Qatar leh Israel chuan board hi an zawm tawh a, Indonesia pawhin a zawm a. Hetih lai hian khawvel ram lian leh US thawhpui khawthlang ramte erawh chuan fimkhur takin an la ngaichang rih mek.