Bollywood star ten engzat nge an hlawh

Hrithik Roshan leh Deepika Padukone te channa ‘Fighter’ chu box office-ah a hlawhtling hle a, ni li chhungin khawvel huapin cheng vaibelchhe 200 chuang a lalut hman der tawh. Chutihrualin he film an chan manah a changtu ten engzat nge an hlawh tih hriat a chakawm ta tlat.
Times of India thudawnnain a tarlan danin Hrithik Roshan hian ‘Fighter’ film a chan manah cheng vaibelchhe 85 a inchhiar a, Deepika Padukone pawhin cheng vaibelchhe 20 a inchhiar a ni awm e.
Bollywood star-te vawi khat film chan man hi a sang ve ta talh talh hle a, nikum September khan Siasat-in a tarlan danin Hrithik Roshan hian film pakhat chan manah cheng vaibelchhe 75 atanga vaibelchhe 100 a inchhiar tlangpui a ni.
Hrithik Roshan hi Indian film star zinga hlawh sang ber te zingah a tel a, Shah Rukh Khan hian film pakhat chan manah cheng vaibelchhe 100-200 a inchhiar a, Salman Khan (vbc 100-150), Aamir Khan (vbc 100-150), Akshay Kumar (vbc 70-145), Ajay Devgn (vbc 60-125), Ranbir Kapoor (vbc 60-75), Ranveer Singh (vbc 30-50) te pawh hlawh sang zual an ni.
Hmeichhe lamah Deepika Padukone hi Indian actress hlawh sang ber niin, film pakhat chan manah cheng vaibelchhe 15-30 a inchhiar tlangpui a, Kangana Ranaut (vbc 15-27), Priyanka Chopra (vbc 14-23), Katrina Kaif (vbc 15-21), Alia Bhatt (vbc 20-25), Shraddha Kapoor (vbc 15-30), Kareena Kapoor (vbc 10-15) leh Anushka Sharma (vbc 15-18) te pawh a sang zual zingah an tel.