Box office-ah ‘Barbie’-in lawm a la hlawh ber
Greta Gerwig direct ‘Barbie’ movie chuan tun weekend kalta khan North America-ah cinema hall ticket hralhna atangin dollar maktaduai 93 lalut lehin, a kar hnih nan box office-ah a No.1 a, hetihrual hian ‘Oppenheimer’ pawh No.2-ah bawk a la awm.
Barbie hian tun weekend kalta khan US pawnah dollar maktaduai 131.5 a lalut bawk a, tihian ni 10 chhunga US atanga a lakluh chu dollar maktaduai 351.4 a tling tawh a, US pawna a lakluh zawng zawng pawh dollar maktaduai 423.1 tling tawhin, a vaiin dollar maktaduai 774.5 a lalut tling tawh a ni.
Magrot Robbie leh Ryan Reynolds te channa Barbie hian tunkar a ral leh meuh chuan dollar tluklehdingawn a lalut thei ngei dawn niin an chhut a, hetiang hi a thleng thei a nih chuan hmeichhe director-in amah chauha a direct film zinga dollar tluklehdingawn lalut thei hmasa ber a ni dawn a ni.
Atom Bomb siamchhuahnaa a sulsutu pawimawh physicist J. Robert Oppenheimer chanchin behchhana film an siam ‘Oppenheimer’ pawhin tun weekend kalta khan North America-ah dollar maktaduai 46.2 lalut lehin No.2 a la ni a, he film pawh hian ni 10 chhungin US-ah dollar maktaduai 174.6 lalut tawhin, US pawnah dollar maktaduai 226.3 a lalut tawh bawk a, a vaiin dollar maktaduai 400.4 a tlin ve ta bawk. He film hi Christopher Nolan direct a ni a, Nolan-a film siam zinga sum lalut tam parukna a ni pha der tawh.
Film tlangzarh thar ‘Haunted Mansion’-in dollar maktaduai 24 lalutin No.3-ah a debut a, he film hi dollar maktaduai 150 senga siam a ni a, US pawnah dollar maktaduai 9 a lalut thei bawk. He film hi LaKeith Stanfield, Tiffany Haddish, Owen Wilson, Danny DeVito leg Rosario Dawson te channa a ni.
‘Sound of Freedom’-in dollar maktaduai 12.4 lalut lehin No.4 a la ni a, he film hian kar li chhungin US-ah dollar maktaduai 150 a lalut tling ve ta.
Tom Cruise channa ‘Mission Impossible: Dead Reckoninh Part 1’ a la che tha thawkhat a, dollar maktaduai 10.7 lalut lehin No.5 a la ni a, he film hian kar thum chhungin US-ah dollar maktaduai 139.2 lalut tawhin, US pawnah dollar maktaduai 309.3 a lalut tawh bawk.
Supernatural horror movie ‘Talk to Me’-in dollar maktaduai 10 lalutin No.6-ah a debut a, he film Danny leh Michael Philippou te direct niin, Sophie Wilde channa a ni a, dollar maktaduai 4.5 chauh senga siam a ni ve thung.
Box office top 10:
1. “Barbie,” $93 million
2. “Opppenheimer,” $46.2
3. “Haunted Mansion,” $24.2 million
4. “Sound of Freedom,” $12.4 million.
5. “Mission: Impossible – Dead Reckoning Part One,” $10.7 million.
6. “Talk to Me,” $10 million
7. “Indiana Jones and the Dial of Destiny,” $4 million
8. “Elemental,” $3.4 million
9. “Insidious: The Red Door,” $3.2 million
10. “Rocky Aur Rani Ki Prem Kahaani,” $1.6 million