Box office-ah Blake Lively leh Ryan Reynolds te nupa an che\ha
Hollywood star ve ve innei an ni a, lar pawh an lar, Ryan Reynolds leh Hugh Jackman channa ‘Deadpool & Wolverine’ leh Reynolds nupui Blake Lively channa ‘It Ends With Us’ te chu North American box office-ah No.1 leh No.2 an ni.
‘Deadpool & Wolverine’ hian an tlangzarh atanga weekend vawi thumnaah Norh America-ah cinema hall ticket hralhna atangin dollar maktaduai 54.2 la lut lehin, a kar thum nan box office No.1 a ni leh ta a, he film hian kar thum chhunga US-a sum a lak luh tawh chu dollar maktaduai 494.3 tling tawhin,. US pawnah dollar maktaduai 535.2 a la lut tawh bawk a, tihian kar thum chhungin khawvel huapin dollar tluklehdingawn 1.029 a la lut tling ta a ni.
Blake Lively channa leh a produce ni bawk film tlangzarh thar ‘It Ends With Us’-in opening weekend-ah dollar maktaduai 50 la lutin box office No.2 a ni a, US pawnah dollar maktaduai 30 la lut bawkin, opening weekend-ah khawvel huapin dollar maktaduai 80 a la lut ve ngha a, a changtunu ber anga Blake Lively channa-ah chuan opening weekend-a sum la lut hnem ber a la ni.
‘It Ends With Us’-ah hian Blake Lively chu Lily Bloom anga changin, naupan lai nun hrehawm tak a hman hnua Boston-ah mahni puala sumdawnna a kalpui theih tak dan te, chutah neurosurgeon Ryle Kincaid(Justin Baldoni) nen intawngin, an inhmangaih ta hle a, chutiang karah chuan Lily ngaihzawng hlui Atlas Corrigan (Brandon Sklenar) rawn lang ve lehin, Lily nun a rawn chawk buai leh leh tak dan vel te tarlanna a ni.
He film hi Colleen Hoover best-selling novel behchhana chan a ni a, Colleen lehkhabu film-a an siam hmasak ber niin, a film siam nan hian marketing tel lovin dollar maktaduai 25 vel an seng.
Film tlangzarh tar, Hollywood star rual channa ‘Borderlands’-in beisei a pha lo hle a, Cate Blanchett, Kevin Hart, Jamie Lee Curtis, Jack Black, Ariana Greenblatt leh Florian Munbteanu te channa hian opening weekend-ah dollar maktaduai 8.8 chiah a la lut a, No.4 chu a ni pha tho. He film hi video game behchhana siam a ni a, dollar maktaduai 110 vel senga siam a ni.
Box office top 10:
1 Deadpool & Wolverine $54,175,000
2 It Ends With Us $50,000,000
3 Twisters $15,000,000
4 Borderlands $8,800,000
5 Despicable Me 4 $8,000,000
6 Trap $6,725,000
7 Inside Out 2 $4,956,000
8 Harold and the Purple Crayon $3,100,000
9 Cuckoo $3,012,500
10 Longlegs $2,000,000