Box office-ah ‘Flight Risk’ a thlawk sang ber
Box office-ah ‘Flight Risk’ a thlawk sang ber
Mel Gibson film siam ‘Flight Risk’ chuan tun weekend kalta khan US-ah cinema hall ticket hralhna atangin dollar maktaduai 12 a la lut a, Nort American box office No.1 a ni. He film hi Mark Wahlberg leh Michelle Dockery te channa a ni. Hetihrual hian Oscar nomination an puan taka nomination 10 nei tei ‘The Brutalist’ pawh cinema hall ticket hralh a kal thar leh deuh a, No.10 a ni e. Box office ranking hi weekend (Zirtawpni – Pathianni) chhunga US-a cinema hall ticket hralhna sum che vel atanga tehin siam thin a ni.
‘Flight Risk’-ah hian Mark Wahlberg chu pilot niin, Air Marshall (Michelle Dockery) leh bikbo tum mek (Topher Grace) te Alaska lamah a thlawhpui a, chuta an thil tawn vel tarlanna a ni.
Gibson hian 2016 khan ‘Hacksaw Ridge’ a lo direct tawh a, chumia a film direct leh hmasak ber niin, review leh audience score lamah chuan ‘Hacksaw Ridge’ hi a pha lo deuh zawk tlat mai. Gibson sawi takah chuan US President Donald Trump-a’n Hollywood veteran pathum- Mel Gibson, Jon Voight leh Sylvester Stallone te chu Hollywood ‘special ambassador’ atan a ruat a, anni hian entertainment khawvela Hollywood chawi nung thar leh turin hma an la dawn a ni.
Oscar nomination an puan hnuah nomination-a langsar deuh te hi cinema hall lamah an lun thar leh deuh thin a, kumin nomination-a langsar tak, nomination 10 nei thei ‘The Brutalist’ pawh a film darkat thum leh a chanve zeta sei ni mah se dollar maktaduai 2.9 la lut lehin No.10 a la ni thei.
‘Mufasa: The Lion King’-in an tlangzarh atanga weekend vawi ruknaah US-ah dollar maktaduai 8.7 la lut lehin No.2 a la ni thei a, he film hian khawvel huapin dollar maktaduai 626.7 a la lut tling tawh. Keke Palmer leh SZA channa ‘One of Them Days’ pawhin a weekend vawi hnihnaah dollar maktaduai 8 la lut lehin No.3 a la ni.
Box office top 10:
1. “Flight Risk,” $12 million.
2. “Mufasa: The Lion King,” $8.7 million.
3. “One of Them Days,” $8 million.
4. “Sonic the Hedgehog 3,” $5.5 million.
5. “Moana 2,” $4.3 million.
6. “Presence,” $3.4 million.
7. “Wolf Man,” $3.4 million.
8. “A Complete Unknown,” $3.1 million.
9. “Den of Thieves 2: Pantera,” $3 million.
10. “The Brutalist,” $2.9 million.