Box office-ah Mean Girls a No.1
Thlasik khaw vawh vanglai a ni a, cinema hall lam pawh an thawl hle a, film tlangzarh thar pawh a awm meuh lo. Hetiang karah hian ‘Mean Girls’ an tlangzarh atanga weekend vawi hnihnaah North American box office No.1 a ni leh ta a, thawm nei ve deuh a film tlangzarh thar awm chhun ‘I.S.S.’-in beisei a pha lo hle bawk.
‘Mean Girls’ hian tun weekend kalta kan North America-ah cinema hall ticket hralhna atangin dollar maktaduai 12 lalut lehin, hei hi box office-ah a vawi hnih nan a No.1 pui a, tihian ni 10 chhungin US-ah dollar maktaduai 50 a lalut tling ta a ni.
Action film, Jason Statham channa ‘The Beekeeper’-in a weekend vawi hnihnaah dollar maktaduai 8.5 lalut lehin No.2 a ni a, he film pawh hian ni 10 chhungin US-ah dollar maktaduai 31.1 a lalut tling ta a, US pawnah maktaduai 44.2 lalut tawh bawkin, a vaiin dollar maktaduai 75.2 a tlin ve ta.
Krismas lai vela box office No.1 lo ni tawh ‘Wonka’-in dollar maktaduai 6.4 lalut lehin No.3 a la ni a, he film hian US-ah dollar maktaduai 187.2 lalut tawhin, US pawnah dollar maktaduai 344.6 a lalut tawh bawk a, tihian a vaiin dollar maktaduai 531.8 a tlin der tawh a ni.
Romantic comedy, Glen Powell leh Sydney Sweeney channa ‘Anyone But You’-in dollar maktaduai 5.4 lalut lehin No.4 a ni a, he film hian US-ah maktaduai 64 a lalut tling ta.
Top 5 khartu chu animated film ‘Migration’ a ni a, dollar maktaduai 5.3 lalut lehin No.5 a la ni a, he film hian US-ah dollar maktaduai 94.7 lalut tawhin, US pawna a lakluh nen chuan maktaduai 191.6 a tlin ve der tawh a ni.
Film tlangzarh thar, thriller, ‘I.S.S.’ hi Gabriela Cowperthwaite direct niin, Ariana DeBose leh Chris Messina te channa a ni a, space station-a astronaut-te inkara buaina vel tarlanna a ni. He film hian opening weekend-ah dollar maktaduai 3 lalutin, No.7 a ni.
Box office top 10:
1. Mean Girls : $12M
2. The Beekeeper : $8.5M
3. Wonka : $6.4M
4. Anyone But You : $5.4M
5. Migration : $5.3M
6. Aquaman and the Lost Kingdom : $3.7M
7. I.S.S. : $3M
8. Night Swim : $2.7M
9. The Boys in the Boat : $2.5M
10. Poor Things : $2M