Box office-ah ‘M:I 7’ a No.1
Box office-ah ‘M:I 7’ a No.1
Tom Cruise channa action film hriat ‘Mission: Impossible’ chu a film pasarihna ‘Mission : Impossible – Dead Reckoning Part One’ an tlangzarh leh ta a, tun weekend kalta khan North America-ah cinema hall ticket hralhna atangin dollar maktaduai 56.2 a lalut a, North American box office-ah a No.1.
‘M:I 7’ hian beisei a pha lo deuh a, dollar maktaduai 90 vel tal lalut thei tura an hisap a ni. Heti chung chuan ‘M:I’ franchise-ah chuan opening weekend-a sum lakluh tamah pahnihna a la ni pha tho a ni. US pawnlamah a che chhe hran lo a, dollar maktaduai 155 lalut theiin, a vaiin dollar maktaduai 235 a lalut nghal a ni. He film siam nan hian (marketing tel lovin) dollar maktaduai 295 vel an seng.
‘M:I 7’ hi Christopher McQuarrie direct niin, Tom Cruise chu Agent Ethan Hunt lemah bawk a chang leh a, ani bakah hian Hayley Atwell, Vanessa Kirby, Henry Czerny, Rebecca Ferguson, Ving Rhames leh Simon Pegg te pawh an inlan.
Sakhaw rinna lam kaihhnawih political thriller ‘Sound of Freedom’ a la che tha thawkhat a, dollar maktaduai 25 lalut lehin No.2 a la ni a, he film hian ni 10 chhungin US-ah dollar maktaduai 83 a lalut tling ta a ni.
Kar kalta box office No.1 ‘Insidious: The Red Door’-in dollar maktaduai 13 lalut lehin No.3-ah a tawlh a, he film pawh hian ni 10 chhungin US-ah dollar maktaduai 58.1 a lalut tling ta a, US pawna a lakluh nen chuan dollar maktaduai 122.6 a lalut tling ve ta bawk.
Indiana Jones and the Dial of Destiny-in dollar maktaduai 12 lalut lehin No.4 a la ni a, tihian kar thum chhungin US-ah dollar maktaduai 125.3 lalut tawhin, US pawna a lakluh nen chuan dollar maktaduai 302.4 a tlin ve ta a ni.
Elemental pawh a la che tha thawkhat a, he animated film hian dollar maktaduai 8.7 lalut lehin, US pawna a lakluh nen chuan chuan kar li chhungin dollar maktaduai 311.7 a lalut tling ta a ni.
Box office Top 10:
1 Mission: Impossible Dead Reckoning Part One $56,200,000
2 Sound of Freedom $27,000,000
3 Insidious: The Red Door $13,000,000
4 Indiana Jones and the Dial of Destiny $12,000,000
5 Elemental $8,700,000
6 Spider-Man: Across the Spider-Verse $6,050,000
7 Transformers: Rise of the Beasts $3,420,000
8 No Hard Feelings $3,300,000
9 Joy Ride $2,575,000
10 The Little Mermaid $2,350,000