Box office-ah record siamin ‘Deadpool & Wolverine’ a No.1
Ryan Reynolds leh Hugh Jackman canna superhero movie ‘Deadpool and Wolverine’ chu Zirtawpni kalta atang khan cinema hall-ah an chhuah tan a, a hit hle a, North America leh khawvel huap pawhin record chi hrang hrang a siam nghal nual a, opening weekend-ah North America-ah cinema hall ticket hralhna atangin dollar maktaduai 205 la lutin box office No.1 a ni.
He film hi R-rated-ah chuan film tlangzarh tawh zingah opening weekend-a North America-a cinema hall ticket hralhna atanga sum lak luh tamah pariatna a ni a, a hmaa pariat ni thin chu Deadpool film hmasa ber kha niin, 2016 khan opening weekend-ah dollar maktaduai 133.7 a la lut ve thung a, 2018 Deadpool 2 an tlangzarh leh khan opening weekend-ah dollar maktaduai 125.5 a la lut ve le bawk. US pawn lamah pawh a hit le a, ram hrang hrang 55 atangin opening weekend-ah dollar maktaduai 233.3 a la lut nghal a, tihian US-a a lak luh nen chuan opening weekend-ah dollar maktaduai 438.3 a tlin nghal der.
Reynolds tan a film channa zinga opening weekend-a sum la lut hnem ber a la ni a, Jackman tan a pangana a ni ve thung. He film hi July thlaa film tlangzarh tawh zawng zawngah opening weekend-a sum la lut tam ber a la ni, kumina opening weekend-a sum la lut tam ber a la ni bawk.
Twisters pawh a la kal tluang viau a, a weekend vawi hnihnaah dollar maktaduai 36 la lut lehin No.1 atangin No.2-ah a tawlh a, he film hian ni 10 chhungin North America-ah cinema hall ticket hralhna atangin dollar maktaduai 155.6 la lut tawhin, US pawna a lak luh nen chuan dollar maktaduai 221.9 a tlin ve der tawh bawk.
Animated movie Despicable Me 4 pawhin dollar maktaduai 14.2 la lut lehin No.3 a la ni a, he film pawh hian North America-ah dollar maktaduai 290.9 a la lut tling tawh a, ram danga a lak luh nen chuan dollar maktaduai 677.7 a tlin ve der tawh bawk.
North American Box office top 10:
1 Deadpool & Wolverine $20,50,00,000
2 Twisters $3,53,00,000
3 Despicable Me 4 $1,42,00,000
4 Inside Out 2 $83,00,000
5 Longlegs $67,65,000
6 A Quiet Place: Day One $30,25,000
7 Bad Boys: Ride or Die $12,75,000
8 The Fabulous Four $10,10,614
9 Fly Me to the Moon $7,50,000
10 MaXXXine $2,31,820