Box office sum chevel tlak chhiat laiin ‘Furiosa’ ala No.1

Tun weekend kalta khan North American box office-ah tun kum 30 chhunga Memorial Day opening chhiat ber tum an tawng a, chu mai a la ni lo, chawlh a lo awm bawk a, weekend nen, ni li chhung chawlh awm chung pawha tun kum 29 chhunga cinema hall sum che vel tlem ber tum a ni bawk. Nikum tun ang hun aiin 36%-in sum che vel hi a tlem zawk nghe nghe a ni. Hetiang boruak karah hian ‘Furiosa: A Mad Max Saga’ leh ‘The Garfield Movie’te an inum tawk hle a, weekend bikah ‘Furiosa’ a chungnung hret a, chawlh ni khat awm nena lak chuan ‘The Garfield Movie’ a sang ve hret thung.
Anya Taylor Joy channa ‘Furiosa’ hian tun weekend kalta khan dollar maktaduai 25.5 lalutin, weekend box office-ah a No.1 leh ta a ni. Hetihrual hian The Garfield Movie hian North America-ah tun weekend kalta khan cinema hall ticket hralhna atangin dollar maktaduai 24.7 a la lut a, hei bakah hian chawlh ni khat nen, ni li chhungin US-ah cinema hall ticket hralhna atangin dollar maktaduai 31.9 a la lut thei ve thung.
Tun weekend liamta kha Memorial Day-a cinema hall sum che vel tlem tum a ni a. Tun aia Memorial Day box office sum che vel tlem tum chu 1995 kha niin, hemi tum chuan Casper-in dollar maktaduai 22.5 lalutin box office No.1 a ni. He statistic-ah hian COVID-19 vanglai, 2020 kha chu lak tel loh a ni. Kumin Memorial Day hi cinema hall sum che vel a chhe hle a, ni li chhunga cinema hall sum che vel chu dollar maktaduai 127-130 a ni a, chu chu tun kum 29 chhung a Memorial Day cinema hall sum che vel tlem ber tum a la ni. Hetah pawh hian 2020 leh 2021 lak tel loh a ni.
‘Garfield’-ah hian Chris Pratt-a’n a aw a thawh a, a film siam nan hian dollar maktaduai 60 vel an seng a, US pawn, ram rang hrang 51-ah dollar maktaduai 59.2 lalut tawhin, a vaiin dollar maktaduai 91.1 a lalut tawh. US pawn lamah hian kar khatin he film hi an tlangzarh hmasa zawk a ni.
‘IF’-in dollar maktaduai 16 lalut lehin No.3 a la ni a, he film pawh hian US-ah kar hnih chhungin dollar maktaduai 63.6 a lalut tling ta a, US pawna a lakluh nen chuan dollar maktaduai 103.6 a lalut tling ta.
Box office No.1 hlui Kingdom of the Planet of te Apes pawhin a weekend vawi thumnaah dollar maktaduai 13.3 lalut lehin No.4 a la ni a, he film hian US-ah kar thum chhungin dollar maktaduai 126.5 lalut tawhin, US pawna a lakluh nen chuan dollar maktaduai 298.5 a lalut tling ve tawh bawk.
Box office top 10:
1 Furiosa: A Mad Max Saga $25,550,000
2 The Garfield Movie $24,775,000
3 IF $16,100,000
4 Kingdom of the Planet of the Apes $13,356,000
5 The Fall Guy $5,920,000
6 The Strangers: Chapter 1 $5,610,000
7 Sight $2,695,930
8 Challengers $1,380,000
9 Babes $1,060,000
10 Back to Black $1,050,000