Brazil-a hot air balloon chesualah mi pariat thi

Brazil-a hot air balloon chesualah mi pariat thi
Brazil chhim lama Santa Catarina state-ah hot air balloon chetsual avangin mi pariat an thi niin state governor-in a sawi.
Praia Grande khawpuia Inrinni tuk (India-a zan)-a chetsualna thlengah hian balloon-ah hian mi 21 an chuang niin Jorginho Mello-a chuan X-ah a tar lang.
A khalhtu telin mi 13 chu an dam chhuak a, tumah chin hriat loh pawh an awm lo niin state sorkar press office chuan a tar lang.
Brazil-a National Civil Aviation Agency (Anac) chuan he thil thleng ‘chhuina leh thlawhna leh thawktu dinhmun thlithlainaah’ a tih theih ang zawng zawng an ti tih an sawi.
“A dam chhuak zinga mi, a khalhtuin a sawi dan chuan an chuanna basket a alh veleh balloon chu a tihniam nghal a, lei an thleng tep tihah an zuang chhuak hlawm a ni,” tiin Praia Grande police station-a officer Tiago Luiz Lemos-a chuan a hmunah thuthar lakhawmtute a hrilh.
“Thenkhat an zuan chhuah hnuah thenkhat an chhuak ve mai ta lo va, kangmei rawn intan lehin a zân tawh avangin a kâng sang leh a. A hnu lawkah a tla ta a ni,” a ti.
Thi zingah hian nupa tuak hnih, nu leh a fanu, ophthalmologist leh figure skater te an tel a. Hliam tuarte chu a bul hnai damdawi inah dah an ni.
A balloon thlawhna neitu, balloon tour company Sobrevoar Serviços Turísticos chuan chhiatna thlen atang hian an hna thawh zawng zawng an tawpsan nghal tih an sawi.
Anac-in inkaihhruaina an siam ang zawng zawng an zawm famkim vek a, tun hma lamin hetiang tawhsual hi an la tawh ngai loh bawk thu an sawi.
“Vanduaithlak takin kan pilot tawnhriat nei tha em emin tih dan tur zawng zawng ti chung leh a chuangte chhan him vek tuma a bei chungin hetiang chhiatna hi kan tawk ta a, hrehawm kan ti tak zet a ni,” tiin company chuan thu an chhuah.
X-a video a dah chhuahah China-a ram thil pawimawha zin mek, Mello-a chuan an state sorkar chu ‘chhanchhuah, puih leh a tuartute hnem’ kawngah a tul apiang ti tura a hrilh thu leh thil thleng chu a vil reng thu a sawi.
“He thil hi pawi kan tiin thite kan sun a. A thlen dan kan chhui dawn a, tunah rih erawh chuan a tuartute leh an chhungte ngaihsak hi kan tih tur a ni rih a ni,” a ti.
President Luiz Inácio Lula da Silva pawhin X-ah a tuartute a tawrhpui thu a sawi a. Sorkar laipui atanga a tih theih apiang tih a inhuam thu sawiin state leh khawpui hotute nen chhanchhuah leh a damte enkawlnaah theihtawp an chhuah tlang tih a sawi.
Santa Catarina chhim lama awm, Praia Grande hi khualzinten balloon-a thlawhna tur a tam avangin an pan nasat thin a ni.