Sports Ministry lamin National Sports Awards dawng tur an ennawn!

India rama infiamna thlura chawimawina semchhuah thin National Sports Awards chu semchhuah theih mai tawh dawna a lan hnuah tihkhawtlai a ni a, a chhan pawh Sports Ministry lamin a thlan dan kalphung leh a dawngtu tur a ennawn leh vang niin, hei hi a phu ngeite’n award an dawn duhna vang a nih thu sawrkar thuchhuah chuan a tarlang.
Ministry hian award dawng tur thlan dan (criteria) felfai zawk a zawng a, a phu chiah lote’n nomination an hmuh palh theih ven a duh a, selection panel-a mihring tlem zawk dah a duh bawk.
Hockey player Hardik Singh chu kumin hian sawrkar hnuaia infiamna huanga chawimawina sang ber Khel Ratna (Major Dhyan Chand Khel Ratna Award) dawng tura rawt (recommend) awmchhun niin media lamin an tarlang a; Khel Ratna hnuai chiah Arjuna Award dwng thei turin infiammi 24 chhawpchhuah an ni thung.
Khel Ratna hian cash prize cheng nuai 25 keng telin, while Arjuna Award-in Rs. 15 lakh a keng tel ve bawk.
Awards selection committee lam chuan nikum December thla daih tawh khan an ‘recommendation’ an thehlut fel tawh a, mahse, tun thlengin award dawngtu turte hming chu ministry lamin a la tarchhuak thei lo a, Thawhtanni khan an tihkhawtlai chhan puangin, a thlangtu committee lamin chawimawina dawng tura an thlanchhuahte an ennawn leh mek tih an sawi.
National Sports Awards hi tihdan pangngaiah chuan hockey legend Major Dhyan Chand-a piancham August ni 29-ah India president-in a semchhuak thin a; tunhnai kum tam vak lo liamta atang khan he tihphung (tradition) hi an zawm ta lo fo a, tournament lian thenkhat avang leh chhan dang neuh neuhin nomination kalphung a nghawng buai vangte a ni thin.
Kumina Arjuna award dawng tura rawt zingah rawlthar chess star Divya Deshmukh leh decathlete Tejaswin Shankar an tel.
Tleirawl kum 19 mi Deshmukh hi Indian hmeichhe zinga World Cup trophy hawn thei hmasaber niin, Shankar hian Asian Games 2023-ah khan history siamin silver medal a awrh a, nikum Asian Championships-ah pawh pahnihna a ni leh bawk.
Tejaswin hian social media post-ah ministry rorel dan a sawisel a, “Heti angte chu awards selection committee lamin nikum December thlaa an recommend-ho hming an thehluh hma khan lo buaipui daih tawh tur alawm. Thla li hnu daihah kan zirchiang ti loin. He award dawng tur hming tarchhuah leh sem hun tihkhawtlai hian infiammite a tihnual zo vek a, infiammite zahlohna a ni bawk,” a ti piap piap!
Yogasana athlete (Yoga hmanga infiammi) Aarti Pal pawh Arjuna award dawng tura recommend zingah hian telin, Sports Ministry-in he discipline (Yogasana) a recognise atanga kum nganaah Yogasana athlete zing atangin nominee an lo chhuak ta a ni.