Brics group ten ‘world order’ thlak duh

South Africa-a Brics group of nations foreign minister meeting te chuan Western ram te thununna siam thata global order inbuk tawk zawka siam an duh thu an sawi.
South African Foreign Minister Laledi Pandor chuan group vision ber chu geopolitics boruak sosang tak, intluktlanlohna leh global insecurity nasa takah global leadership pek a ni tiin a sawi a.
Brics hi Brazil, Russia, India, China leh South Africa tihna a ni a. Inhmuhkhawmna hi Ukraine-ah Russia-in war crimes a kalpui nia puhna chuan a bawh buai hle a ni.
International Criminal Court (ICC) chuan Russian President Vladimir Putin war crime kalpuia puhin manna thupek a tichhuak a, ICC member a nih angin South Africa chuan August thlaa Johannedburg a Brics summit neihah Putin hi a kal a nih chuan man tura ngaih a ni bawk.
Brics hi developed nations intelkhawm G7 eltu ber anga ngaih a ni a, thla kalta lawk khan G7 te hian Japanese city Hiroshima-ah summit an nei zo chiah thung a. G7 member te chuan Russia leh China an sawisel na hle a ni.
Brics ramah hian mipui 3.2 billion vel chengin khawvel puma mipui cheng 8 billion atanga 40% vel lawih an awh a ni.
Cape Town-a inbiakna ni khatnaah Indian Minister of External Affairs Subramanyam Jaishankar chuan Brics te chuan ‘khawvel hi multipolar a ni tawh a, siam that ngai niin kalphung hluiin harsatna awm thar te a chingfel thei tawh lo’ tih lantir a ngai tiin a sawi a.
“Kan buaina bul ber chu economic concentration niin hei vang hian ram tam ber te chu ram tlemte te zahngaihna hnuaiah an awm a ni,” tiin a sawi.
Brazilian Foreign Minister Mauro Vieira pawhin Brics chu ‘multipolar world order siamna kawngah leh ram thanglai mek te mamawhna tihpuitlin kawnga hnawl theih loh bur’ tiin a sawi.
Chinese Vice Foreign Minister Ma Zhaoxu chuan Brics group chu developing ram leh market economies te tihhmasawna puih zel nan tihlen ni se a ti bawk a.
Russian Foreign Minister Sergei Lavrov pawhin chung ram tam tak zingah chuan Saudi Arabia pawhin group zawm an duh tiin a sawi bawk a. Mahse, inhmuhkhawmnaah hian Lavrov inlan chu lungawilohna lantir khum niin ‘Naupang thattu’ tiin a thlalak an lo tarkhum thung.
Lungawi lo zinga pakhat chuan South Africa officials tena ‘Ukrainian naupang te laka systematic war kalpuitu a chibai chu hriatthiam theih loh’ tiin a sawi zui bawk.
South Africa-a rorel lai mek Afican national Congress (ANC) te hian hun rei tawh tak ata Russia nen white-minority tena kum 1994 hma lama rorelna an chan lai daih tawha inzawmna tha tak nei niin tunah pawh Moscow in Ukraine a run chu an sawisel duh miah lo a ni.
Tunkar tir lam pawh khan South Africa deputy minister chuan an ram chuan an dan neih te siam thain tichuan ICC ah inziak lut mahse ram hruaitu an man duh leh duh loh chu anmahni thutlukna ni tura dah an tum thu a sawi.
News conference a neihnaah Dr Padnor chu August thlaa Brics summit neihnaah Putin a kal chuan man a ni ang em tia zawhna pawh, “President Cyril Ramaphosa an South Africa dinna tur a sawi chiang mai ang” tiin a chhang a ni.