Brighton lakah Arsenal an zawr

Kar tawp Zirtawpni leh Inrinni zan khan English Premier League (EPL) 2026-27 khelh chhunzawm a ni a, London club lian Arsenal, Chelsea leh Tottenham Hotspurs te an tlawm vek a, London club lian tlawm kar a ni. Season thara khel tha tak Arsenal chu Brighton & Hove Albion lakah an zawr a, 3-0 ngawtin an tlawm. Season thara chetha Gunners an tlawm rual hian Chelsea leh Tottenham te an talbuai chhunzawm ve thung.
Arsenal ngam loh Brighton
EPL season thara la chak vek Arsenal hi season thara khel tha ve tho Brighton hmachhawn turin American Express Stadium-ah an lenglut. Mikhual an nihna hmunah an khel chhe viau a, season tharah a vawi khat nan tlawmin an mualpho.
English Carabao Cup atanga Manchester United hnawtchhuaktu Brighton hian EPL champion Arsenal lakah an khel tha viau a, an mikhualte hi hun tha an pe duh lo. An khingpuite hi an hlauhawm a ni tih hriain an zim tawt zung zung a, hunawl an pe duh lo. An mualah tha taka inlanin goal thun hmasa zawkh an tang ta nge nge. Mualneitu Brighton tan hian Pascal Gross chuan minute 31-naah Kostoulas siamsak atangin hmahruaina goal a thun.
Goal an thun vangin an phur viau a, inrintawkna sang zawk nen an mualah an inlan chhunzawm. Goal thun belh tum viau mah se chawlhlawk hmain goal an thun belh thei lo va, Gunners pawhin an hun tha neih an chhawr tangkai zo bik lova, chawlhlawk hmain goal a luh belh thei lo.
Chawlhlawk hmain goal dang aluh belh thei lo mah se chawlhlawk hnu lamah goal a luh belh thuai thung. Second half tantirhte-ah Brighton tan goal hmahruai siamchhuaktu Charalambos Kostoulas chuan goal a thun nghal a, an hmahruaina a tizau. Minute 45-na leka goal an thun hnuin Chema Andrés chuan minute 57-naah Brighton tan an goal thumna a thun zui leh zat a, an hmahruaina a tizaau leh zual. Champion lai lakah si thum ngawta hma an hruai vangin American Express Stadium-a Brighton tantute boruak chu pui tak a ni.
’ Goal thun tumin tan khawh chiam thin mahse Arsenal in hun tawp thlengin goal an thun thei lo tluang a, season thara a vawi khat nan an tlawm ta nge nge. Gunners hi season kal meka inelna hrang hrangah vawi sarih ngawt an chak zawn hman a. EPL-ah phei chuan an khelh hnuhnung vawi kuaah an chak vek nghe nghe. An hnuhma tha tak chu Brighton in an lo nawhrehsak a, Gunners hi Brighton lakah chiangkuang takin an tlawm zui ta a ni.
3-0 ngawta Arsenal sawptu Brighton hian khelh nga atanga point 10 hmuin pathumna an luah a, an chungah point 12 hmu tawh ve ve Arsenal leh Manchester City te an awm mek a ni.
Tottenham an buai thui zel
18-na ni chunga 2025-26 season khar London club lian Tottenham Hotspurs chu season tharah an buai zui leh nghal zat a, inrinni zanah an tlawm leh vangin Spurs hi an buai thui leh zual. Season tharah khelh li atanga point hnih chauh la hmu Tottenham hi an mikhual Aston Villa lakah 3-2 in an tlawm.
Tottenham leh an mikhual Aston Villa te hi an inhnehtawk viau a, goal pawh a lut thei lawk lo. Goal thun tuma an innawr tawn fo hnuin mikhual team an che fuh hmasa a, Johan Manzambi chuan chawlhlawk dawn hnaih minute 45’+4-ah hmahruaina goal a thun a. 1-0 a hmahruai chungin chawlhlawk an hmang.
Chawlhlawk hnu lamah Aston Villa an khel tha chhunzawm a, goal hnih an thun belh leh. 1-0 a hmahruai mek Villa tan hian Nicolas Jackson chuan minute 67-naah an goal thumna thunin an hmahruaina a tizau a. Minute 79-naah Emiliano Buendía chuan an goal thumna a thun zui leh zat a, mikhual an nihna hmunah 3-0 ngawta hmahruaiin an dinhmun a tha hman hle.
An mualah ngei 3-0 ngawta hnufual tawh Tottenham in goal thun ngei tumin tan an khawh a, Conor Gallagher chuan minute 86-naah goal thunin an si phurh a sut then a. Jan Paul van Hecke chuan hun pek belh tawn dawn tep minute 90’+8-naah an goal hnihna thun zui leh bawk mah se tlawm an pumpelh thei ta chuang lova, talbuai chhunzawm zelin an mualah an tlawm leh ta nge nge a ni.
An mual ngeia tlawm leh a Tottenham hian season tharah khelh nga atangin point 2 chauh an la hmu a, table hnuai ber dawttu an luah. An hnuaia awmchhun Fulham aiin an khel tam zawk a, Fulham in Manchester United lakah point an hmu a nih chuan Tottenham hi table hnuai berah an awm dawn tihna a ni.
Zirtawp zan khan London club lian Chelsea pawh an tlawm a, mikhual an nihna hmunah 3-0 ngawtin mualneitu Brentford an ngam lo. Xabi Alonso hnuaiah phur taka inlan Chelsea hian khelh 5 atanga point 7 hmuin pa 9-na an luah mek a. Point 9 hmuin Brentford in pa4-na an luah ve mek thung.