BRO-in motor kal theihna kawng sang ber an siam leh ta

Border Roads Organisation (BRO) ‘Project Himank’ chuan history siamin, an record siam tawh khumin Guinness World Record thar, khawvela motor kal theihna kang sang ber record an siam leh ta.
BRO hian hlawhtling takin Mig La Pass an thleng thei ta a, Likaru-Mig-La-Fukche kawng, Leh district ami hi feet 19,400 a sang niin, khawvela motor kal theihna kawng sang ber a ni.
A hmaa hetiang record pawh hi BRO siam tho niin, feet 19,024 a sang, Umling La chu motor kal theihna kawng sang ber a ni thin a, hei hi Mig La Pass hian a rawn khum ta a ni.
BRO team, Project Himank tana Chief Engineer Brig Vishal Srivastava chuan October ni 2 khan Mig La Pass hi thlengin, Indian flag leh BRO flag a tar nghal a ni. Likaru atangin Mig La pass kal tlangin Fukche khua a thlen theih ta a, India leh China ramri bul lawk a ni tawh.
Tunhma chuan Khardung La kha motor kal theihna kawng sang ber a ni thin a, Umling La a rawn awm leh a, tunah chuan Mig La a awm leh ta a, Himalaya pangper, kawng bakbahai tak a ni a, kawng siam pawh a hautak hle a, boruak vawt lutuk bakah oxygen a tlem tawh avangin hnathawh vel pawh a hautak hle a, thli a la tam em em zui bawk.