BSF-in raltlante kirtir leh

Thla hmasa mai khan BSF te’n Mizorama tlanchhia mi engemaw zat an kirtir a, thla tharah pawh an kirtir leh tawh.
July ni 4, Nilaini khan Bangladesh atanga Mizorama tlanchhiate chu BSF te’n manin an kirtir leh a, mahni khua an thleng em tih erawh hriat a ni rih lo.
Thu dawn danin, Nilaini-a kirtirte hi mi 30 vel an ni a, Lawngtlai district-a Damdep khua an luh hnuah BSF te’n manin an kirtir a ni. Damdep khaw bulah hian Theka lui a awm a, lui ral lehlam chu Bangladesh a ni. Lui thleng hian BSF te’n an hruai a ni.
BSF te kirtir hi mi eng zat nge an nih chiah hriat a ni rih lo a, mi 30 vel tih chu thu laknain a sawi dan niin, naupang an awm nual a, hmeichhia an awm nual bawk, a ti.
Bangladesh-a Chittagong Hill Tracts-a Zo hnahthlak mi engemaw zat chu Mizoramah an raltlan mek a, Mizorama tlanchhiat tum mi engemaw zat chu BSF te hian lo dangin an kirtir tawh. June ni 15 pawh khan mi 200 vel Lawngtlai district-a Kamtali khuaah an tlanlut a, BSF te’n a tukah an kirtir leh.
Thu dawn danin, BSF te hi an khauh hle a, Mizorama tlanchhiat tumte lo dang tura chhun zan zawma an duty bakah raltlante lo puih tumte pawh an dang nasa. Nilaini-a Damdep-a lutte pawh hi an thlalak an phal lo a, a lo la tawhte pawh BSF te hian an delete-tir.
July ni 4-a kirtirte hi June ni 16-a kirtir tawhte an ni fur tih thu dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More