Sawrkar kal tawhah eiru lo tura intiam ngam la awm lo – ZPM consultant

Sawrkar tawhte ah eiru lo tura intiam lawk ngam MLA an la awm loa, ZPM MLA candidate-te eiru lo tura an intiam ngam ringawt pawh chuan Mizoram a khaichhuah a ring tih ZPM consultant PL Liandinga chuan a sawi.
Thawhtannia an party office-a inkhawmah ZPM consultant hian kan ram hmasawnna daltu chu eirukna a ni a, ram hruaituten an hnuaia eirukna an tih reh theih loh chhan chu anmahni an fihlim loh vang a nih a ring tlat tih a sawi.
“Eirukna hi retheihna avangin a awm loa, rilru zawk a ni. ZPM-a inziaklut leh ZPM-a phur em emte hian contract ka chang ve ang a, ka hlep teuh ang, tih lam rilru an pu loa, kan ram hi dingchhuak se, Mizoram hi changkang ve ila, tih ringawt an ngaihtuah a, chuvang chuan ZPM sawrkar hun an nghak a ni. Chutihlaia kan MLA candidate-ten ‘ka eiru loang’ an tih chuan Mizoram hi kan khaichhuah ka ring nghet tlat,” a ti.
Sawrkar kal tawhten hetiang hian an tih ve ngam loh thu leh, MLA-te berin an eiruk loh phawt chuan midang tan eiruk ngam a har tur thu PL Liandinga hian a sawi. Hlemhletna in kan nunah hmun thuk tak luah tawh mah se, ZPM a sawrkar chuan kalphung thar hnuaiah chuan thil a nih tur angin a thleng mai dawn tih a sawi bawk.
“Tuna kan sawrkarah pawh hian eirukna laka fihlim em em MLA leh minister ka hmu a, mahse an che thei lo. Sports lam na takin an nawr dawn emaw tih laiin phullem phahah an tawp leh ringawt a, kan population ngaihtuahin India rama phullem ngah ber kan ni ringawt. Kan sawrkar anga, khawiah nge kalphung thar chu tia inzawh inzawh a ngai loang. Kamrul-a tel loa sawrkar kalpui ringawt pawh kalphung thar a ni tawh dawn a, hetiang loa kan kal hian kalphung thar chu a ni mai,” a ti