BSNL-in Mizorama hmalakna thar leh hmachhawp an sawi

Telecom Advisory Committee (TAC) Mizoram chu an chairman, Lok Sabha MP Richard Vanlalhmangaiha kaihhruaiin an thukhawm a.TAC member-te bakah Mizorama BSNL Business Area (BA) aiawh officer-te an tel.
Chairman chuan, BSNL hotute chu Mizorama khaw awm zawng zawng thleng pha tura an huang tizau a, an thlen chin network tha taka thuam turin a chah a. A bikin sawrkar laipui hmalakna – PM Poshan, VB-G RAM G, NREGA leh a dangte changtlung zawka kalpui a nih theihnan geo-tagging tihchak kawnga Mizoramin hma a sawn theihnan tan la lehzual tura fuihin, project pawimawh tak tak an kalpui mek – DBN 4G Saturation Project, BOP-BIP Project, Indo-Myanmar Project leh a dangte chu theihtawp chhuaha bawhzui zel turin a chah.
BSNL Mizoram BA general manager BP Meena chuan Mizorama Telecom hmalakna tlangpui a sawizau a. Telecom hmalakna Phase-IX hnuaiah Mizorama hmun 111 ah leh 4G Saturation Project hnuaia hmun 30 ah 4G network bun a ni tih a sawi.
Sawrkar laipui chuan BharatNet Programme (ABP) hnuaiah thingtlang lama digital connectivity tih chakhna turin chak takin hma a la mek tih a sawi a. He programme hnuaiah hian Mizorama Gram Panchayats 776 chu optical fibre network (OFC) hmanga thlunzawm vek an ni dawn a, OFC hi km. 5600 awh tura rin a ni tih a sawi.
Thutkhawmah hian BSNL hotute chuan tunhnaiah Saitual, Khawzawl leh Champhai district headquarters-ah OFC connectivity tihzauh belh a ni tih sawiin, telecom leh broadband service thuamthatna atan Serchhip, Lunglei, Lawngtlai leh Siaha ah bandwidth capacities tihchak lehzual a ni dawn tih an sawi bawk.