BTS member zinga Artist 100-a No.1 ni hmasa ber Jimin

BTS member zinga Artist 100-a No.1 ni hmasa ber Jimin
Jimin chu Billboard Artist 100 chart-ah No.10 atangin No.1-ah a invawrh a, BTS member zingah he chart-a solo artist anga No.1 ni thei hmasa ber a ni.
Billboard Artist 100 chart hi kar khat chhunga US-a zaithiam lar dan tehna a ni a, chart ranking siam nan hian kar khat chhunga album leh hla hralhna bakah streaming leh radio airplay te chu tehna pawimawh a ni.
Jimin hian a album FACE leh he album-a hla te hralh that zar a zo a, ‘FACE’ album hi kar khat chhungin US-ah 1,64,000 hralhin Billboard 200 (albums) chart No.2-ah a debut a, he album-a a hla ‘Like Crazy’ chu Billboard Hot 100 (singles) chart-ah No.1 niin, BTS member zinga Hot 100 chart-a solo artist anga No.1 hmasa ber a nih bakah Korean artist zinga solo anga he chart-a No.1 hmasa ber a ni bawk a, hei hian Artist 100 chart-ah pawh a vawrh sang ta a ni.
South Korean act zingah Artist 100 chart-ah hian BTS chu No.1 ni ngun berin, kar 21 an No.1 tling tawh a, BLACKPINK leh Stray Kids te kar hnih ve ve an No.1 tawh a, SuperM, TOMORROW X TOGETHER leh TWICE te kar khat theuh an No.1 tawh bawk.
Lana Del Rey chu chart No.29 atangin No.5-ah a invawrh a. ani pawh hian a album thar ‘Did You Knoe There’s A Tunner Under Ocean Blvd’ chu 1,15,000 hralhin Billboard 200 chart-ah No.3 a kai pui a, hei hian Artist 100 chart-ah pawh a vawrh sang ta a ni.
Fall Out Boy pawhin an LP So Much (For) Stardust’ chu kar khat chhungin 64,000 hralhin Billboard 200-ah No.6 an kaipui a, he album-a hla te Hot 100 a lang a awm nual bawk a, chu chuan Artist 100-ah pawh an dinhmun siam thain No.8 an ni.