BUDGET LEIBA LEH PENSION

By C.Lalsawta IAS (Rtd)
Tunlaiin Mizoram Budget leh chuta Leiba kan neih zat leh Pension-a kan senso turten kan Sorkar sum leh mipuite welfare a nghawng dan chungchangah hriatdan/ngaihdan inmil lo leh inhnialna a chawkchhuak viau a. Kei takngial pawh min rawn zawt ve leh zauh thin bawk a. Ka hre kimchang tak tak bik lo nain kan Budget atanga ka hmuh dan tlem kan sawilang leh mai ang e.
GSDP leh LEIBA: GDP (Gross Domestic Product) hi ram hrang hrangah economy than dan leh ram changkan dan tehna hmanrua ber a niin a lang a , dik famkim lo mah se (Democracy hi tha famkim loh mah se Sorkar siamna hmanraw hrang hrang zingah a tha ber tih ang deuhin) tehkhawng tha berah kan ngai a. Ram chhunga State-te financial & economic condition tehnan chuan GSDP (Gross State Domestic Product) hi kan hmang thung a.
Tunlaiin “India ram State zingah Leiba nei tlem ber kan ni” tih leh “GSDP atanga chhutin Leiba nei tam ber kan ni” tih hi an lar viau a ni awm e. Lehkha ziak leh chhiar thiam tehna Literacy Rate atan chuan rampum mihring zat emaw, tunah chuan kum 6 chin chung lam mihring awm zat atanga za zel (percentage/ percentum) atanga chhut a nih ang hian State hrang hrang dinhmun a inan loh em avang hian GSDP atanga chhut tur ni awm tak a ni a. Mahse GSDP tehfung a tha famkim lo angin a teh dan chi hrang, entirnan (1) at factor cost leh (2) at current prices an hmang thin a.
Mizoramah chuan GSDP tehnan “at current prices” kan hmang a. Budget 2022-23 kal laiah chuan hei hi 41.29 % a ni a. Kum 2023-24 lo awm tur atan chuan estimate chu 37.84 % a ni. Whatsapp a thehdarh India mapa State hrang hrangte Leiba percentage hi a source a lang lo va, RBI nge ka hre lo bawk a, at factor cost nge at current prices tih a lang lo bawk a; kan leiba percentage (53.1%) hi a sang ber a. A tehfung inang khat an hman phawt chuan khaikhin nan chuan a rintlak turah ka ngai a. Chhutna chi hrang hrang atanga kan chhut pawhin Leiba hi chu kan ngah viau a ni. Tunlaiin kan tu-leh-fate tan sum-leh-pai, inhmun/ram etc duham lutukin kan khawlkhawm kan tih thin lain Sorkar-ah chuan sum-leh-pai dehchhuahna tur, eizawnna tur productive assets/infrastructure tha tawk hnutchhiah si lovin kan tu-leh-fate tan leiba phur rit lutuk kan hnutchhiah ang tih a hlauhawm khawp mai. Ram-leh-Hnam hmangaihtu, ram tana inpete chuan ngaipawimawh se a duhawm khawp mai.
State Budget thar bera a lan dan chuan 2023-24-ah chuan kan GSDP chu Rs Vaibelchhe 35,904.04 a ni ang a, Leiba tlingkhawm (Outstanding Liabilities) chu Rs Vbc. 13,584.80 a ni ang. Hemi bakah hemi chhunga sum puk belh tur Rs Vbc. 2479.00 a ni a. Leiba rulhnan Rs Vbc. 1442.51 leh a pung (Interest) rulhnan Rs Vbc. 662.23 a ni anga, a kum lehah chuan Leiba tlingkhawm hi Vbc. 14,671.58-ah a pung bawk ang.
Leiba rulhnan leh Interest (a pung) rulhnan Rs Vbc. 2104 lai kan hman a tul laiin ram changkanna tur, Capital Outlay-ah chuan Rs Vbc. 1696.68 chauh a ni thung ang. Kan leiba leh interest rulhna tur (Rs Vbc. 2104.74) hi kan sum lakluh tur (Tax Revenues leh Non-Tax Revenues belhkhawm) Rs Vbc. 1981.29 aiin a tam zawk zuk a, Ram changkanna tur (Capital Outlay) Rs Vbc. 1696.68 aiin a tam fe zawk bawk! (Mizoramah hian mihring nuai 13 vel or chhungkua 2,30,000 vel lo awm ta ila, kan leiba tlingkhawm hi mipuiin rul dawn ta ila, chhungkaw tinin chawhrualin Rs nuai 6 vel theuh kan thawhlawm a tul ang, NLUP/SEDP sum mi thenkhatin an dawn zawng zawng nen pawh khaikhin ila ka leiba hi a tlem lo viau awm e.
OLD PENSION VS NEW PENSION SCHEME:
Tunlaiin Federation of Mizoram Government Employees & Workers (FMGEW) chuan Central rate of DA tihpun, Pension hun kum 62 a tihsan leh New Pension Scheme atanga Old Pension Scheme a kir lehte an phut a ni awm a. Politician-te pawhin vote hmuh nan anmahni tan zawngin hma an la bawk emaw ni? MZP te erawh chuan thangthar lehkhathiam hna hmu lote eizawn nan Sorkar hnaruak tam zawk a awm theihnan pension kum tihsan an lo do ve thung a ni awm e.
Mizoramah hian Sorkar hnathawk (Employees leh Workers) hi an tam hle mai a, (50,000 vel an ni awm e), vote bank lian tham tak pawh an ni ang. Hnathawk tam avangin hna erawh a chak phahin a that phah lem lo mai thei. Mipuite rawngbawltu (Public Servants) an nih angin an hlawh phu tawkin hna an thawk em, mipuiten an chhawr tangkai tawk em tih chu ngaihtuah tham tak a ni. Seventh Pay Commission recommendation anga Central Pay la angin inchhal bawk thin mah se, Central-a an counterpart te hlawh ang an hlawh em tih hi chu mipui-mimir leh hotute pawh hian an ngaihtuah peih lem lo a niang nge!
Central Pay Commission recommendation anga Central Sorkar-in Grade/Class I, II, III, IV emaw First Class/ Fourth Class tih ang reng ti boa Group A,B,C,& D tia Central Sorkarin a tihdanglamna a rei tawh teh lul nen, tunah phei chuan Group D tih pawh tihbo a nih hnuah pawh Mizoramah chuan Grade IV tih hming pua thawk hi a sang tel tehmauh kan la awm zuk nia! Kum 2016 hnuah phei chuan Grade IV/ Group D tih vel hi an la tawh lova, an nei tawh lo hrim hrim a, khatih laia thawk laite pawh retrain-in MTS (Group C) ah an let vek tawh a ni a. Mizoramah erawh Grade IV/ Group D hna thawh tirin Group C hlawh kan hlawh tir a. LDC-te phei chu Central Sorkar hnuaia LDC (PM Level 2) hlawh aiah UDC hlawh zat (Pay Matrix Level 4) kan hlawh tir a, kan UDC te chu Central Sorkar Directorates hnuaia Assistants hlawh (PM Level 6) kan hlawh tir a, chutiang zelin, Central Sorkar hnuaia an counterpart emaw an tlukpui hnai berte aia step 2 emaw a aia sang zawk hlawh an hlawh tir a. State Services (MCS, MPS, MSS, MES, MF&AS etc) a top post- Supertime-A/ Secretary to Govt. te chuan IAS- Secretary & Commissioner/ IGP hlawh PM Level 14 an hlawh a. State Sorkar hian State Sorkar hnuaia thawkte hi Central-a an Counterpart or a tlukpui hnai ber hlawh leh DA zat chiah pek turin ti se FMGEW te hi chuan an duh kher awm lo ve. A chawma chawma hawp bawk hi a tlaiawm a ni ang e.
State Budget 2023-24 ang chuan Hlawh (Rs Vbc. 4453.24) leh Pension (Rs Vbc. 1875.69) leh Interest payment (Rs Vbc. 662.23) belhkhawm Rs Vbc. 6991.16 hi a tam viau a ni. Hei hi kan Tax Revenues leh Non-Tax Revenues belhkhawm Rs Vbc. 1981.29 hian 28.3% emaw chauh a tum pha dawn a ni. Sum indaih lo tur reng chu a lo nih hi.
Tin, Pension-a kan senso tur ( Rs Vbc. 1875.69) ringawt pawh hi ram hmasawnna tur (Capital Outlay) Rs Vbc. 1696.68 ai pawhin zuk tam zawk aa! Kan State sum lakkhawm (Tax & Non-Tax) Rs Vbc. 1981.29 zat thuak a ni lehnghal bawk!
Sawi tawh angin Pension sum senso sang lutuk hian Central Sorkar ngei pawh a tibuai tawh a. Sipai tanglai (Nuai 13 vel) hlawh aia tam hi an pension-ah a senral thin tawh avangin Arms & Equipment pawh duh anga tha leh tam an neih theih loh phah a. Sipai lak thar tur (Agniveers etc) te pawh kum 4 emaw lek hnuah pension awm lovin an bantir leh zel dawn a ni. Central Civil Pension pawhin kumin atangin thawk laite hlawh a khum tawh dawn a ni. Mizoramah erawh, kan la naupan leh pensioner kan tlem vangte, kan dam rei loh vang te pawh a ni thei, kan Pension hian thawk laite hlawh zat a la thleng lo, mahse Old Pension Scheme anga kan kal zel chuan Central buaina aia nasa zawk hi kan la thleng thei! Chutih laia Old Pension Scheme a kir leh tura hma lak chu thil atthlak tak a nih duh mai hmel.
A reng reng thuah mipuite rawngbawltu (Public Servant-te) hlawh leh pension hi chu an rawngbawlsaka te tumsak tur ni awm tak a ni a. Old Pension Scheme-ah erawh chuan an rawngbawl sakate ni lo, thangthar ten an pension an tum sak a ni a, an eizawnna tur leh assets tha takte hnutchhiah bawk si lo, leiba tam tak nena pension pe tura thangtharte phurrit hnutchhiah hi ram-leh-hnam hmangaihtute tih tur ni awm lo tak a ni a.
New Pension Scheme-ah erawh chuan an pension tur ai kha a chhawrtuin pension contribution hmangin a lo pe lawk a, chu chu theih anga thaa invest tur a ni a, an hna atanga an chawlh hunah chung chu a pung nen pekchhuah an ni ang a, a then chu Pension scheme-ah vek an dah lut leh thei a, a bak chu in-leh-lo dinnan leh thil dangah an hmang thei dawn a ni. Mi thenkhatin NPS hnuaiah Pension ang chi, tar hnua invenna tur (security) awm miah lo anga an sawi thin chu hriat loh vang emaw a ni thei e. Ram leh-hnam hmangaihtu tak tak hotute chuan ngaihtuah chiana kawng dik kawhhmuh a tha ngawt a