Budget pawn atangin sum kan hmu tam – Sports minister

Infiamna ruhrel tihchangtlunna atana state budget pawnlam atangin sum tam tak an hmu tih Sports & Youth Services minister Robert Romawia Royte chuan a sawi.
Lunglei District Football Association hruaitute sum thawhkhawma buatsaih LDFA Presidential Cup 2023 chu Nilaini zan khan Lungleiah Sports minister hian a khuhhawng. Tun sawrkarah infiamna ruhrel tihchangtlunna’n state budget piahlamah central leh agency hrang hrang atangin hmasawnna hna thawhna tur sum tam tak hmuh a nih thu sawiin, Lunglei district-a hma lak mekna te a sawi.
Lunglei thalaiten football-a hma an sawn theihna’na LDFA hruaitu – president, senior vice president leh vice president ten cheng nuaithum thawhkhawma LDFA Presidential Cup an buatsaih chu lawmawm a tih thu Sports minister hian a sawi a. Lunglei district-in infiamna kawnga hma a sawn theihna’n sawrkarin hmalakna tam tak a kalpui a, a hlawhtlinna pawh a takin hmuh zel a ni tih a sawi.