Raltlan kaihhnawiha mihringa sumdawng awm thu la hre lo

Raltlante remchanga laa mihring hmanga sumdawnna kalpui tum emaw an chunga hlei lenna lam thil emaw a thlen an la hre lo tih Champhai district bawrhsap James Lalrinchhana chuan a sawi.
Champhai district-ah Myanmar atanga raltlan 12209 awmin refugee camp 34 a awm mek a; heng zinga 3546 hi hmeichhia niin naupang 4830 an awm. Ei leh in bakah an sahimna ngaihpawimawh a tul tih bawrhsap hian sawiin, a bikin hmeichhia leh naupangte enkawl kawngah tan lak zual a ngai tih a sawi a ni.
Raltlante chhawmdawl kawnga mualpho loa tun thenga an awm chu kan zavaia tanrualna vang a nih thu leh chhawmnun zel tul a tih thu a sawi a. Raltlan dinhmun remchangah laa mihring hmanga sumdawnna emaw an chunga hleilenna thlen a awm lohna’n tan lak a ngai tih sawiin, “Sawkarin theihtawp a chhuah a, tun thlengin Champhai district-ah harsatna a awm lo nia hriat a ni,” a ti.
Myanmar atanga raltlante chhinchhiahna runpui biography & biometric kalpui chhoh thuai a nih thu leh September thla chhunga zawhfel hman tum a nih thu a sawi a ni.
Heng thu hi Health & Family Welfare department undivided Champhai district hnuaia damdawi in 16 bakah Sub Centre leh Health & Wellness Centre 59 ten a tul anga an hman tur hriselna kawnga hmanrua a hlannaah Champhai district bawrhsap hian a sawi a. Heng hmanrua hi nodal agency Impulse NGO Network leh state partner CodNerc tangdun hmalakna kaltlanga dawn a ni. Mangang tak takte chu an dinhmun ang tawn loh chuan an harsatna tawhte hriatfiah a har tih sawiin, tanpui ngaite tanpui kawnga sawrkar tha tichaka pen chhuak thin NGO-te fakawm a tih thu a sawi.