Mizoram rorelna sang berah roreltute’n Budget Session an nei mek a, tum dang ang bawkin TV-ah live-a pek chhuah a ni. Inthlan kum a nih vang nge, mipui pawhin an thlir a, sawi zui luih luih pawh a awm nual.
Parliamentarian lo tak tak, mak tih tur a awm nual; minister Robert Romawia Royte leh opposition group leader Lalduhoma te an inhnial a, an inhnial chhung hian “Pu Speaker” ti lovin, inhmatawna inhnial ang hian an inhnial miah miah! Speaker-in an pahniha inhmachhawn anga awm lova amah (speaker) address turin a ti hial.
Kar hmasa Ningani khan Speaker Lalrinliana Sailo-in member-te chu ‘point of clarification’ tihna turah ‘point of order’ an ti thin tih a hrilh a, ‘point of clarification’ ti tawh turin a chair atangin a hrilh.
Video clip tihdarh a awm nual a, Congress member C Ngunlianchunga’n “Lo rak ve fo teh suh se ani hi,” tia MNF member Lalrintluanga Sailo a khak lai video clip kha, a darh pawl tak a ni mai thei.
Rintluanga Sailo hian tum dangah a subject sawi lovin ZLP member pakhat a kap chiam a, a (ZLP member) thusawite sawi chhawnga a kah zawhah Congress party a kap zui leh.
An bussiness ngaihtuah lova hetianga thil dang daih sawi hi an ching a, budget general discussion phei chu term danga mite ang bawkin mahni vei zawng sawi nan an hmang tlangpui. Tun tumah hian budget general discussion-ah ding an tlem a, chawhma lam phei chu an ban hma phah!
Member pakhat phei chuan, session hmasa lama a lo tih tawh danin rilru sawina hun atan budget sawihona hun hi a hmang leh a, a hma ang bawkin mipui lamah faktu an awm leh tho.
Budget Session entute’n sawi zui
Get real time updates directly on you device, subscribe now.
Prev Post
Next Post