Buffett-an AI-ah hlauhthawnna nei

Generative artificial intelligence chu kumina thumal lam zin ber pawl ni tawhin a kaihhnawih apps CHatGPT te chu mipui nawlpuite rilru la bertu a ni tawh a. AI chatbots te chu thil hrang hrang tihnana hman a nih mek laiin hmansual hlauhna a lian em em thung a.
Mi thenkhatte chuan AI chuan hna tam tak mihringte a chhuhsak dawn an ti a, techn entrepreneur ten hlauhthawnna nasa tak neiin chung zingah chuan Elon Musk pawh a tel a. Tunah billionaire investor leh Berkshire Hathaway CEO Warren Buffett pawhin hlauhthawnna a neih te a sawi.
Omaha, Nebraska a company annual meeting neihnaah Buffett chuan AI chu atomic bomb nen a tehkhin niin New York Post chuan a tarlang a.
A hma lawkin Buffett chuan ChatGPT hmang chhinin a billionaire thian Bill Gates ah a kawhhmuh a. AI thiltihtheihna turu tak chu mak a tihrualin hlauthawn a neih thu a sawi nghal thung.
“Hetiang ema thiltithei a nih chuan hlauhthawnna ka nei a. A chhan chu kan titawp thiam tawh dawn lo va. Atomic bomb pawh World War II lai khan a chhan tha tak avangin kan siam chhuak a nih kha,” tiin kum 92-a upa investor chuan a sawi.
“Kan hmuchhuak hi a lawmawmin a pawimawhna pawh a sang ang a. Tun atanga kum zahnih vel chhung chu kan theihna nasa takin kan tipung tihna pawh a ni ang,” tiin a sawi bawk a, Buffett chuan AI chuan ‘khawvel a thlak danglam ang a, mihringte ngaihtuah leh chet dan chauh a khawih danglam lovang’ tiin a sawi.
“Duhthlan tur kan nei lo, mahse, eng emaw kan bul tan tawh tlat a. Einstein khan atomic bomb thlak hnu khan hei hian mihringin a ngaihtuahna tih loh chu thil a thlak danglam vek a ti a. Chutiang chiah chu ka sawi duh dan a ni a, AI chuan khawvel thil engkim a thlak ang a, mihring ngaihtuahna leh chet dan chauh a thlak lovang,” tiin Buffett chuan a sawi bawk.
Buffett thawhpui Charlie Munger pawhin AI chungchang sawi ve in, “Airtificial intelligence kaihhnawih velah hian ngaihthatlohna ka nei. Old-fashioned intelligence a tha tawkin ka hria,” tiin a sawi.
Tun hnai lawkah ‘godfather of AI’ tia hriat lar Geoffrey Hinton pawhin AI chu climate change aiin mihringte tana pawi thei leh hlauhawm zawk tiin a sawi bawk.