Buhfai nen Manipurah Mizoram MLA kal

Buhfai nen Manipurah Mizoram MLA kal
Manipur lam atanga ngenna avangin Mizoram MLA Dr L Thangmawia chuan Nilaini khan Churachandpur district Lamka a lut a, buhfai engemawzat a keng tel.
Manipur buaina avangin Lamka pankhawm an tam a, buhfai eitur lamah harsatna an tawhna ngaihtuahpui turin Zomi Students’ Federation (ZSF) chuan MNF Thalai president ni bawk Dr L Thangmawia hi an rawn ngen a. A ni hian chief minister Zoramthanga leh Supply minister K Lalrinliana te hnenah thlenin, Mizoram sawrkar chuan buhfai quintal 200 a ruahman sak a, a dah tur leh harsatna tawkte kan turin Dr L Thangmawia hi sawrkar hotuten an tir nghal a ni.
Lamka-a amah lo dawngsawngtute chuan, hun harsa an tawh laia an mamawhte Mizoram sawrkarin rang taka a ngaihtuah saknaah leh MLA ngeiin a hmuna a tlawh chu lawmawm an tih thu te, an nitin mamawh Mizoram kaltlanga lakluh a ngaih rih dawn thu te, Imphal-a tangkhang mi 20000 velte sipai venna hnuaia Lamka lama hruaichhuah hna kalpui mek chu zawhfel thawkhat a nih tawh thu te, Lamka-ah pawh mahni in chhuahsan raltlan tam tak an awm mek thute lo hrilhin, Mizoram atanga puihna leh tawngtaisakna an dawn zawng zawngah lawmthu an sawi a ni.
Mizoram MLA chuan Mizoram mipuiin Manipur buai avanga kan unaute tawrhna chu mahni tawrhna anga an ngaih thu leh Manipur-ah remna leh muanna a awm thuai an duhsak tak thu te, kohhranhoten an tawngtaisak reng thute a hrilh a. Mizorama tlawmngai pawl hrang hrangten anmahni pui tura theihtawp an chhuah mek thu te a hrilh bawk.
ZSF hian buhfai hi Kuki Khanglai Lawmpi hnenah bag 20 leh Vaiphei People’s Council hnenah bag 20 an pechhuak nghal a, mamawh dangte hnenah an sem chhunzawm dawn a ni.
MLA hian Mizoram atanga zirlai, Lamka-a tangkhang pangate hawna tur a ruahman sak nghal a ni.
Manipur buaina avanga sahimna zawnga Mizorama lutte tan Mizoram sawrkar chuan ni thum kalta chhung khan buhfai quintal 640 a pechhuak tawh a. Aizawl district-a awmte tan quintal 510.40, Kolasib district tan quintal 110 leh Saitual district ah quintal 19.60 semchhuah tawh a ni.