National Technology Day hmang

National Technology Day hmang
National Technology Day vawi 25-na chu India ram hmundang rualin Ningani khan Aizawlah pawh hman a ni.
Institute of Bioresources and Sustainable Development (IBSD) Research Institute chuan anmahni hmun Nursery Veng Khatlaah an hmang a. He hunah hian CLS Academy, Nursery Veng atangin science zirlai leh zirtirtute an tel. Zirlaite hnenah Technology Day hman a nih chhan an hrilhfiah bakah IBSD thawktute chuan an scientific hmanraw neih ang angte hman dan zirlaite hi an zirtir a ni.
Directorate of Science & Technology huaihawtin hman a ni bawk a. Mizoram State Planning Board vice chairman H Rammawi leh Planning & Programme Implementation secretary Lalmalsawma Pachuau ten an hmanpui.
Ram hmasawnna tluantling nei tur chuan technology thiamna hman tangkai a pawimawh tih Planning Board vice chairman hian a sawi a. Technology hrang hrang hi artificial intelligence (AI) an tih chuan khaikhawmin, a innghahna ber a ni tih a sawi. “AI lamah Mizoten rilru kan sen a, tan kan lak a ngai tawh a ni,” a ti.
Thil thar hmuchhuaktu (innovators) te chu an kal zelna turah a aia nasa zawka tan la tur leh, an thiamna leh theihna chu anmahni bakah Mizoram hmasawnna’na hmang turin a chah.
National Technology Day hmannaah hian dan ang taka an khawl siamchhuaha neitu nihna, patent dawngtu mi pali leh helama India huapa inelnaa lawmman dawng hnenah lawmpuina thuziak leh sumfai hlan an ni.
Kum 1998-a India-in ama kutchhuak technology khawvel hriata a phochhuah ni a. Khatih hunlai khan India chuan nuclear siam thei ram a nih zia lantirna’n Rajasthan-a Pokran-ah hlawhtling takin a enchhin a, ‘Trishul’ missile hlawhtling takin a enchhin bakah Thlawhna ‘Hansa-3’ an vuah chu hemi ni hian hlawtling takin a thlawhtir bawk. Kum 1999 atang khan rama tana theihtawp chhuah thintu scientists, engineers, technologists leh researchers ho hlawhtlinna hriatrengna atan leh, ram hmasawnna atana technology pawimawhna inhrilhhriatna leh inzirtirna atan hman zui a ni.